Menu

L'Alcaldesa de Castrillón, Ángela Vallina, refugó güei les crítiques del PSOE y del PP al respective de la marcha del conceyu y recordó que'l conceyu, a pesar de la política obstruccionista de la oposición, cuenta yá con presupuestos.

Sobre'l pidimientu de cese de los socialistes, y la moción de censura que proponen los populares, la rexidora señaló que nun dexa de ser sorprendente qu'estes dos fuerces coordinen agora les sos  posiciones, xusto dempués de que s'aprobara una moción d'enfotu.

Ángela Vallina aseguró nun entender el xuegu del PSOE, una fuerza que, añedió, en más d'una ocasión alíase cola derecha. “Nun sería la primer vegada qu'en Castrillón el Partíu Slcialista vaya cola derecha, que ye lo que suel facer. Si a nivel estatal el partíu ta mal y tocando fondu, en Castrillón yá hai enforma tiempu que lu tocó. La prueba ta nes sos resultancies electorales. Yo creo que tien la zuna siempres d'echar la culpa a los demás, nun mirar dientro de la casa, nun poner solución y, nesta llexislatura anterior, tengo que recordar que tuvo tres veces cerrada l'agrupación con trés xestores distintes”.

Pa Ángela Vallina el fin de les crítiques del PSOE respuende más a les sos batalles internes qu'a les necesidaes del conceyu. “Tienen un enorme problema y echar les culpes a los demás siempres vien perbién pa nun ver los problemes internos. Nun sabemos qué quieren, porque nós tenemos siempres el despachu abiertu. Ayeri dicíalo nel Plenu, nun hai oposición, ustedes nun son oposición son torgamientu, que ye bien distinto. Nun piensen na ciudadanía nin piensen nel conceyu, solo piensen cómo fadiar al gobiernu y a Izquierda Xunida”.

A entrugues de los medios, al respective de si la Federación Socialista Asturiana tendría de tomar midíes, l'alcaldesa de Castrillón señaló que, teniendo en cuenta les sos resultancies, tendríen de meditalo. “¿Tendríen De tomar midíes? Los númberos, les encuestes tán ende a nivel estatal  asina qu'imaxínese cómo tán en Castrillón”.