Menu

La diputada d'IX considera que nun puede establecese un criteriu kilométricu estrictu

Emilia Vázquez, responsable de los asuntos d'Educación nel grupu parlamentariu d'IX, entiende que la Conseyería d'Educación tendría de revisar la nueva normativa del tresporte escolar aplicada nesti entamu de cursu y establecer una moratoria hasta'l próximu añu, una vegada sía consultada tola comunidá escolar y conceyos. Vázquez considera que los padres fueron conocedores d'estos cambeos cuando los escolares yá taben matriculaos y nun tuvieron oportunidá d'entamase y/o afayase ante esti cambéu qu'enzanca la conciliación de la vida llaboral y familiar cola escolarización nun pudiendo, por casu, camudar de colexu. La diputada tamién entiende que nun puede esistir un criteriu que se circunscriba puramente a distancies kilométriques cuidando que nun ye lo mesmo una distancia nuna ciudá con servicios que la mesma nuna carretera que puede xenerar inseguridá y peligru física pa los chavales. “Especial atención tien de recibir la escuela rural como elementu fundamental del caltenimientu de la población nestes zones ensin que'l tresporte escolar represente un nuevu handicap na so manera de vida, too ello si apostamos polos servicios públicos y la igualdá independientemente onde se viva”, esplicó la diputada. IX sostien que la Conseyería d'Educación tendría de ser sensible a estos “razonables pidimientos” yá que de nun ser asina'l grupu parlamentariu va llevar a cabo iniciatives na Xunta Xeneral.