Menu

La candidata d'IX a Bruxeles denuncia que 5 de les 10 zones de mayor desemplegu xuvenil européu correspuenden a comunidaes autónomes españoles

La candidata d'IX al Parlamentu de Bruxeles, Lara Hernandez, denunció güei el modelu d'integración europea d'España, que significó, dixo, l'esmantelamientu de gran parte del sistema granible industrial a favor d'una estructura basada nel turismu y la construcción. Un modelu nel qu'España se convirtió nun país de segunda, potenciando la precarización de los mozos, asitiando al país a lo cabero de la Unión n'empléu de los menores de 35 años. “La crisis económica ta revelando con muncha claridá que la manera nel que se nos dexó entrar na UE ye traicionaero oblíganos a desmantelar el nuesu sistema granible y a asumir un papel de país periféricu, dependiente, d'un centru que ta asitiáu xeográficamente nos países del norte d'Europa y oblíganos a aguiyar ciertos sectores como son el turismu y la construcción que conducieron a esta situación actual de crisis y de retayos”, afirmó la candidata, que llega a la política dende'l movimientu del 15-M, del que foi una de los sos voceros

La mocedá foi unu de los sectores más cutíos poles polítiques d'axuste, señaló Lara Hernández, magar, esclarió, l'altu índiz de desempléu ye daqué estructural y previu a la crisis. “Anguaño la tasa de paru xuvenil n'España ye d'un 56%, tengo que recordar que 5 Comunidaes Autónomes d'España tán ente les 10 rexones d'Europa cola tasa de paru xuvenil más alta. N'Asturies, más d'un 62% de paru xuvenil. Nun ye una situación que se llinde a un contestu de crisis económica: ye estructural, inclusive nos supuestos años de bonanza, sol Gobiernu del Partíu Popular, la mocedá vivía una situación precaria estructural: un 40% de contratos temporales tán en manos de moces d'ente 24 y 29 años”.

Y les reformes llaborales nun tán contribuyendo, a xuiciu de la candidata d'IX, a ameyorar la situación, otra manera, añedió, ta estendiéndose cada vez más la figura de becarios, al traviés de contratos de formación, onde nun hai una relación llaboral de fechu. “Esti tipu de contratos estiéndense, amás, de manera indefinida nel tiempu y son miles los casos de les persones que lleguen a ocupar esti tipu de puestos”.

Hernández criticó de forma especial la falta de sensibilidá del PP y lo que, na so opinión, foi una ridiculización del procesu migratoriu por razones económiques que vivieron y viven los mozos españoles y del qu'ella mesma nun foi ayena, teniendo qu'expatriase a Berlín pa poder atopar emplegu. Frente al esiliu llaboral, reprochó Lara Hernánez, el Gobiernu y altos dirixentes del PP tomaron la vía de la ridiculización del procesu de busca de trabayu nel esterior con declaraciones como les de Fátima Báñez, falando de movilidá esterior, o les de la Secretaria d'Estáu d'Emigración ya Inmigración refiriéndose al instintu aventureru. L'oxetivu ye, denunció, despintar les cifres de paru.

“L'añu pasáu, la Encuesta de la Población Activa (GUO) revela que, per primer vegada, la cifra de persones en disponibilidad de trabayar baxa. Estos datos, que'l Gobiernu nun ta sacando a la lluz, lo que demuestren ye que somos cada vez más les persones que tenemos que dinos fora a trabayar”, afirmó la candidata d'IX.

El falseamientu de la realidá afecta tamién al padrón. Asina, esplicó Lara Hernández, dizse qu'hai 500.000 estranxeros que tán tornando a los sos países d'orixe y 141.000 españoles que retornen: “ye falso. Lo que se ta acelerando'l procesu de naturalización de persones estranxeres que moren n'España. Esto ye lo que tenemos que denunciar, qu'esti modelu actual que tenemos ta basáu precisamente na Unión Europea, na manera en qu'a España se nos obliga a xuntanos y la manera que, tantu'l PP como'l PSOE, nesti xuegu bipartidista, tán plantegando esta salida neolliberal a la crisis, qu'obliga a la mocedá a pasar por esta situación estructural”.

Lara Hernández repitió la trescendencia de la cita del 25 de mayu yá que, dixo, la única forma de parar les polítiques de retayos impuestos pola troika pasa por una nueva correlación de fuerces nel Parlamentu Europea. “Ye importante que tengamos un pie na institución pero mil na cai”.