Menu

Esta midida foi refugada pol PSOE sol argumentu de que rique'l desenvolvimientu nacional d'una normativa europea

El Parlamentu asturianu aprobó esta mañana, cola única oposición del PSOE, la Proposición Non de Llei qu'encamienta al Gobiernu asturianu a que lluche contra la probeza enerxética estableciendo dos tipos de midíes; un bonu social non inferior a 30 euros pa perceptores del salariu social destináu a financiar los suministros básicos del llar y la puesta en marcha d'una llínea específica d'ayuda pal restu de la población que nun puede faer frente a los gastos d'esti capítulu.

Esta iniciativa inclúi tamién una demanda de regulación nacional pa regular los suministros básicos, estableciendo precios sociales y elementos de fiscalidá pa les families con baxos ingresos y que torguen la corte de suministros. Esta última parte foi refugada pol PP y sofitada pol PSOE.


Marta Pulgar, diputada d'IX d'Asturies na Xunta Xeneral, defendió esta mañana esta Proposición Non de Llei que propón lluchar n'Asturies contra la probeza enerxética. La diputada definió'l problema como una realidá evidente y creciente” nos últimos años que, dixo, rique formar parte de l'axenda política con midíes paliatives y cola erradicación de les causes, frente a les polítiques nacionales que fomenten la crecedera de la desigualdá. IX propón la incorporación al salariu social d'un bonu de 30 euros pa faer frente a los costos de la enerxía y la creación d'una nueva llínea d'ayudes pal restu de la población que s'atopa con esti problema.

Pulgar recordó que'l Gobiernu asturianu menta na so Axenda Social la probeza enerxética pero nun apurre nenguna novedá pa consideralo un oxetivu prioritariu y establez puramente que s'encete dende les ayudes d'emerxencia que yá esisten y “son absolutamente insuficientes y coyunturales” y nun resuelven el problema estructural. Tamién alvirtió que la puesta en marcha d'estos dos midíes autonómiques que propón IX nun van significar un aumentu estraordinariu del presupuestu.

La diputada punxo na so intervención los “esmolecedores” númberos de los afectaos: según l'Asociación de Ciencies Ambientales alredor de 65.000 asturianos nun pueden tener una temperatura fayadizo na so casa, nun momentu en qu'hai una baxada de salarios y pensiones y hubo un aumentu esponencial del recibu añal de la lluz que representa 1.100 euros de medría. En 2012, España ye'l 4º país européu con más persones incapaces de caltener la temperatura nos  sos llares, esto ye, 4,3 millones de persones tán nesta situación solo superaos per Italia, Reinu Uníu y Polonia. España ye tamién unu de los países onde más aumentó'l costu de la enerxía ente los años 2006 y 2012 y afecta principalmente a paraos, neños y vieyos.

La Proposición Non de Llei d'IX tamién encamienta al Conseyu de Gobiernu asturianu a que se dirixa al nacional por qu'impulse una normativa que dexe prevenir la probeza enerxética, que regule'l sistema de suministros básicos del llar pa incluyir un mecanismu en que se prime l'aforru y penalícese el consumu ineficiente, garantizando que les tarifes nun sían oxetu de mercáu, estableciendo precios sociales y elementos de fiscalidá enerxética favorables pa les families con baxos ingresos económicos y torgando la corte de suministru a quien nun puedan pagar dichu suministru. Pulgar recordó que nesta mesma llínea fueron delles les iniciatives d'IX nel Congresu de los diputaos mientres esta llexislatura, toes elles baltaes pol rodiellu del Partíu Popular.

El Partíu Socialista considera que la probeza enerxética tien de ser incluyida na política social  pero demandó desenvolver la Directiva Comuñal que llama a los  países a desenvolver la so normativa por que se garantice la non interrupción de servicios esenciales y eso correspuénde-y al Estáu. “Esto ye lo qu'hai que faer y esixe desenvolver normativamente y con precisión lo que significa'l consumidor vulnerable”, esplicó la diputada del PSOE.