Menu

Ángela Vallina sollerta del intentu de PP y PSOE de presentase como salvadores de la crisis cuando fueron les sos polítiques les responsables

La campaña d'IX va ser austera, col contactu directu cola xente y l'usu de materiales reciclaos p'amenorgar al máximu los costos.

IX márcase como oxetivu movilizar el votu de la ciudadanía nos próximos comicios europeos del 25 de mayu, nuna campaña austera cola que pretende esmazcarar al PSOE y el PP, los dos fuerces del bipartidismu que, según la candidata per Asturies al parlamentu Européu, Ángela Vallina, son los responsables de l'aplicación de les polítiques de retayos y perda de derechos ciudadanos. La otra gran meta ye consolidar l'alza d'IX como una fuerza aleternativa.

En total, van ser más de cien acto partíos por tola xeografía asturiana que van dexar, según el coordinador de la campaña, Jaime Gareth Florez, dar “vuelta y media a Asturies”, con actos públicos, xuntes con sindicatos, asociaciones y demás colectivos ciudadanos. L'austeridá va ser otra de les marques de referencia yá que se van utilizar materiales “reciclaos” d'anteriores campaña,  coles mires d'amenorgar al máximu los costos. Nesti sentíu, la secretaria de comunicación d'IX, Mayka Barros, esplicó que la xente y la militancia va ser el principal activu, nun modelu nel qu'afiliaos y simpatizantes sían “auténticos axentes electorales”.

Ángela Vallina apeló a la ciudadanía por que sía consciente de la importancia d'esta cita electoral y sollertó del intentu de los dos partíos mayoritarios d'esviar l'atención, presentándose como lo únicos con capacidá de poner fin a la crisis y los retayos. “Esmoleznos sobremanera'l bipartidismu y los discursos que se tán realizando agora. Nun ye de recibu que'l Partíu Socialista, la señora Elena Valenciano –la candidata socialista- venga agora de salvadora de les polítiques d'austeridá y de retayos cuando son les sos polítiques: con ellos empezaron, col Gobiernu de Zapatero. Una cosa son los discursos y otra los fechos a los que tenemos qu'unvianos. Poro, poca credibilidá con que sían ellos los que vengan agora a faer política pa la ciudadanía”.

La propuesta d'IX n'Europa pasará por plantegar una reforma fiscal para llogra un sistema xustu, añedió Vallina, “como diz la Constitución, progresivu, que pague más el que más tenga y, en concencia, dientro d'eso, el nuesu oxetivu va ser na UE torgar los paraísos fiscales y les operaciones fiscales que se faen dende otros países a ellos”.

El cambéu de fiscalidá y la llucha contra los paraísos fiscales, a xuiciu de la candidata 'IX Asturies, solo va ser posible si tórgase que'l candidatu del PP a la presidencia de la Comisión Europea –auténticu Gobiernu de la Unión-, Jean Claud Juncker, apuerte al cargu. Y ye que, recordó Ángela Vallina, Juncker foi presidente de Luxemburgu, un paraísu fiscal nel senu de la mesma Unión Europea.

Na campaña electoral IX va presentar la so propuesta de reactivación económica, pa lo que propón algamar un 3% del PIB pa poner en marcha un nuevu modelu con capacidá de xeneración d'empléu, compatibilizándola cola protección del mediu ambiente, al traviés d'una fiscalidá verdá “ensin ánimu recaldatoriu”, en palabres d'Ángela Vallina, quien reclamó, amás, la imposición de la denominada Tasa Tobbin a les transacciones bursátiles especulatives, y l'amenorgamientu de dellos impuestos como'l IVA cultural.

La secretaria de comunicación d'IX, Mayka Folles, esplicó qu'el lema de campaña “el poder de la xente” resume l'oxetivu de la formación que ye, dixo, “devolve-y a la xente la voz y los derechos que nos fueron arrampuñaos a lo llargo d'estos años d'alternanza d'eso que llamen grandes partíos: el PP y el PSOE” y PP”.

“Faer un llamamientu al votu, a nun quedase en casa, a alzar la voz que nos quitaron, que tenemos la oportunidá agora de recuperala porque, como dixo Alexis Tsipras –el candidatu del Grupu de la Izquierda Europea a presidir la Comisión Europea- xugamos la vida. Al contrariu de lo que quieren faenos creer de que les elecciones europees nun son importantes y nun nos inflúin, nós tenemos qu'aprofiar que nos inflúin, y enforma, porque n'Europa xueguen condiciones de la nuesa vida, de la nuesa vida diaria”, afirmó Folles.

Pela so parte, Jaime Gareth Florez, destacó que la presencia de trés asturianos na llista de 54 que van allegar por IX a estes elecciones europees, pa les que s'articuló una campaña onde'l contactu cola xente va ser fundamental. “Incluyimos alcuentros sectoriales con sindicatos, colectivos, asociaciones; tocamos el mundu cultural, falamos con asociaciones de vecinos: non queda persona nin colectivu cola que nun tratemos de caltener un alcuentru”.

Tocantes a los actos propios de campaña, ta cerrada la presencia de Javier Couso, Lara Hernández, Tasio Willy Oliver y la cabeza de llista, Willy Meyer que va participar nel actu central, previstu pal sábadu 17 en colegio Xovellanos, de Xixón, a les 12 hores. Tamién va tar, el 19 de mayu'l coordinador federal d'IX, Cayo Lara, que va participar nel actu d'Avilés a celebrar, 19 hores, nel Instituyo Carreño Miranda.