Menu

Namái'l pueblu salva al pueblu, más frente a la gran coalición de PP y PSOE.

Los candidatos d'IX al Parlamentu européu fixeron esta tarde en Mieres un llamamientu a la movilización del votu de la xente como única alternativa p'acabar col bipartidismu y garantizar el fin de la Europa de los retayos. L'activista de los derechos humanos y númberu 7 na llista Federal de la formación a Bruxeles, Javier Couso, pidió reflexón y memoria pa sofitar a unes y otres fuerces. "Namái'l pueblu salva al pueblu, y más nestos momentos nos que yá s'anuncia una gran coalición ente'l PP y el PSOE, ente conservadores y socialdemócrates. Esti ye'l momentu de retayar a los recortadores".

Angela Vallina acometió contra'l discursu y les acciones machistes del PP, que se demuestren, dixo, non yá nes declaraciones como les de Cañete, sinón nel papel que quieren asignar a más de la metá de la población, a la que pretenden llevar a los años nos que, hasta pa vender el so heriedu, precisaben la firma de los sos homes. "Viendo les coses que faen y dicen, nenguna muyer, por dignidá, tendría de votar al Partíu Popular".

El discutiniu ente l'ex ministru y la candidata del PSOE, Elena Valencianu, foi, a xuiciu de Vallina, una escusa pa distrayer a la opinión pública, más allá d'haber dexao al descubiertu'l pensamientu real de Cañete. "Les sos sides llegaron tarde y mal, pero ye qu'amás, nun esplicaron cual ye'l so programa pa Europa y eso lo mesmo sirve pa Cañete que pa Valencianu".

El silenciu de los partíos mayoritarios sobre'l so programa, sicasí, tien bona esplicación, según aseguro Couso, pos esperen al pactu ocultu" que dambes fuerces tienen nel contestu européu pa caltener les polítiques neolliberales actuales y que suponen convertir los países del Sur, como España, Grecia o Portugal, en territorios periféricos y subordinaos a la economía alemana.

La fueya de ruta pa consolidar una Europa del capital lleva décades fita, afirmó Couso, quien recordó que, Gobiernu tres Gobiernu, con independencia de que fuera socialista o popular, traxo la perda de derechos sociales y llaborales, el zarru de los sectores granibles tradicionales y una mayor subordinación a intereses ayenos a los de la ciudadanía.

Unu de los grandes enemigos del cambéu de modelu va ser, a xuiciu tantu de Vallina como de Couso , l'astención. "Al PP y al PSOE nun-yos importa l'astención, yá gobernaron nes postreres y eso qu'entós esa astención algamo'l 54%. Al contrariu, si la xente desencantao, la que sufre los retayos, la que ta esixendo un cambéu nun va'l domingu a votar, a enllenar colos sos votos les urnes, nada va poder faese" afirmó Angela Vallina.

Nel mitin de Mieres, tamién participaron l'alcalde del conceyu, Aníbal Vázquez, quien resalto que nun puede considerase que la cita europea escareza d'importancia: "toles elecciones son importantes, porque en toes decidese daqué. Nesta ocasión, lo que se decide ye'l futuru que queremos, si una Europa social, de los derechos, de la xente, o, como hasta agora, de los bancos del poder na solombra".

El Cordinador d'IX Asturies, Manuel Gonzalez Orviz, aseguró que ye necesario esmazcarar el pactu ocultu ente populares y socialistes. "PP y PSOE nun son lo mesmo, pero faen lo mesmo y nes temes económiques , los qu'afecten a la xente, los que la llevaron al paru, al sufrimientu a la esclusión, apauten. Pa los que tengan duldes, que recuerden que Felipe Gonzalez dixo aquello de, d'entrada, OTAN NON, y a la fin foi OTAN SI. Agora ta asocediendo col pactu del bipartidismu".

Viendo les coses que dicen y faen, nenguna muyer, por dignidá, tendría de votar PP

"Namái'l pueblu salva al pueblu, más frente a la gran coalición de PP y PSOE. Ye'l momentu pa retayar a los recortadores "  @Caninator