Menu

El senador Jesús Iglesias asegura que, amás de xusticia social, supondría un elementu clave pa la reactivación económica

El salariu mediu ye bien inferior a los de países como Francia, Alemaña o Italia

Izquierda Xunida propunxo la xubida del Salariu Mínimu Interprofesional (SMI) pa dexalo na media del salariu mediu, colo que se algamaría aprosimalu a los 1.000 euros al mes. Esta midida, según esplicó esta mañana n'Uviéu'l Senador d'IX Jesús Iglesias, dexaría, amás, una reactivación de la economía, al favorecer mayor renta disponible a les families.

La medría dexaría, amás, amenorgar la fienda con otros países de la eurozona que, señaló'l parllamentariu, tán bien percima d'España no referente a los sueldos de los sos ciudadanos. “El salariu añal mediu nel nuesu país en relación a los países de la eurozona ye bien baxu: representa'l sesenta y pocu per cientu d'un trabayador francés, el 68% d'un trabayador alemán, y pocu más del 80% de lo que cobra un trabayador italianu”.

Respectu al SMI, producióse, resaltó Iglesias, una clara perda del poder adquisitivu. “Ello lastra amás les posibilidaes de recuperación económica. Non solamente ye una inxusticia terrible y un mecanismu más que contribúi al tresvase de rentes del trabayu escontra les rentes del capital dientro de la distribución de la riqueza nel nuesu país sinón que, siendo nesti momentu'l consumu internu unu de los pocos elementos de dinamización económica, obviamente, los baxos salarios, como sollertaba la OCDE, nun contribúin a ameyorar el consumu internu”.

IX reclama amás una revisión de la reforma llaboral que dio llugar a la cayida de los salarios y que s'encete un plan d'actualización del SMI hasta'l 50% del salariu mediu, asitiándose nun ratio similar al de Francia. La xubida, reseñó Iglesias, “supondría convertir en mileuristas a quien perciben el SMI”