Menu

El voceru d'IX, Aurelio Martín, reclama al presidente que sía tan eficaz en poner fin a los retrasos como en cumplir col déficit que marca Montoro

Izquierda Xunida esixó esta mañana al Presidente, Javier Fernández, qu'execute con igual eficacia'l Salariu Social que los planes d'amenorgamientu del déficit, a la vista de los “inaceptables” retrasos que se tán produciendo na tramitación y concesión d'esta prestación social. El voceru de la formación na Xunta Xeneral del Principáu, Aurelio Martín, denunció que, a día de güei, esisten casi 5.000 espedientes ensin resolver, con una demoranza d'ente 15 y 16 meses.

Pa Martín, una ferramienta como'l Salariu Social, “clave” na llucha contra la probeza y la esclusión, nun puede tar nesta situación, polo que-y pidió soluciones en cuenta de xustificaciones. “Había un compromisu, nestos momentos incumplíu per parte de la Conseyera, d'afaer el sistema informáticu, que dexaría qu'a principios de 2014 nun hubiera llista d'espera”. Ello ye que la máxima responsable del departamentu de Bienestar Social, como consta nel diariu de sesiones de 28 de febreru de 2013, anunciaba qu'el so oxetivu yera empezar 2014 ensin llista d'espera, un propósitu que non solo nun se cumplió sinón que caltien la mesma nunos parámetros bien similares a los de 2012.

Aurelio Martín recordó'l prestu que manifiesta de forma sistemática'l gobiernu al respective de los sos ésitos en materia de contención del gastu y amenorgamientu del déficit ya ironizó sobre esa bona xestión: “Reprochémos-y (al presidente) la eficacia que tien al cumplir los criterios del señor Montoro, Ministru de Facienda del Gobiernu d'España en materia de déficit, y que esa mesma eficacia nun la treslladen a un asuntu tan importante y que fai sufrir a tantes families como ye tema del salariu social”.

Pal voceru d'IX, el Gobiernu ta incumpliendo los mandatos que s'aprueben por unanimidá nel Parlamentu y la so propia palabra, daqué para lo que solo ye necesariu recurrir al diariu de sesiones de la Xunta Xeneral del Principáu.