Menu

Aurelio Martín considera que la Conseyera ta incumpliendo la Llei de Bon Gobiernu ya incompatibilidaes aprobada pol mesmu executivu

L'artículu 10 fai incompatible'l desempeñu d'un altu cargu públicu cola propiedá d'ella o de so conyugue  d'un 10% d'acciones d'una empresa

Aurelio Martín, voceru parlamentariu d'IX na Xunta Xeneral, pidió güei l'arrenunciu d'Esther  Díaz como Conseyera de Bienestar Social dempués de que se conociera que tien una participación del 19,8% na empresa Davelco, y que la so propiedá compartela col so home. A xuiciu de Martín la so situación ye incompatible cola Llei de Bon Gobiernu ya incompatibilidaes, más en concretu col so artículu 10, aprobáu pol Gobiernu de Javier Fernández y en tramitación na Xunta Xeneral como proyectu de llei. Más allá de qu'esti proyectu de llei tenga qu'aprobase entá na Cámara, y siguiendo criterios de coherencia y exemplaridá colo qu'ella mesma aprueba nos conseyos de Gobiernu “creo qu'ella mesma tendría d'abandonar  la conseyería”, esplicó Martín. A xuiciu de Martín el siguiente “artículu nun da llugar a duldes”.

L'artículu 10 d'esti proyectu aprobáu pol Conseyu de Gobiernu diz:

1. El desempeñu d'un altu cargu va ser compatible coles siguientes actividaes privaes, siempres que col so exerciciu nun se comprometa la imparcialidá o independencia nel exerciciu de la so función:

a) L'alministración del patrimoniu personal o familiar, coles llimitaciones de nun tener, por sigo o col so cónyuge o persona con quien conviva n'análoga relación d'afectividá o fíos dependientes y persones tutelaes, participación cimera a un diez per cientu n'empreses que tengan suscritos conciertos o contratos de cualquier naturaleza col sector públicu autonómicu o bien que sían subcontratistas de tales empreses, o reciban subvenciones provenientes de cualquier entidá integrante de dichu sector públicu.
El proyectu de llei atopar en fase d'enmiendes na Xunta Xeneral.
 
Per otru llau, na constitución de la Comisión d'Investigación del Caso Villa, IX votó a favor de que'l presidente sía Ignacio Priendes y pa los cargos de vicepresidente y secretariu de la mesa votó en blancu. De siguío queda faer el cronograma de trabayu ya IX pide que los grupos obren con flexibilidá y manzorga. La coalición ta a favor de que comparezan nun primer momentu Villa y Postigo y los que la comisión determine y pídase la documentación al empar.  “Si dempués ye necesariu llamar otra vegada a dellos comparecientes más palantre, nun pasa nada”, aseguró Martín al términu d'esta sesión de la comisión, que conforma al pie de Luis Álvarez Payu.  A xuiciu de Martín nun esiste tanta diferencia ente solicitar   la documentación primeru y depués llamar a declarar o faer al aviesu, anque nesti últimu casu cree Martín qu'a “la ciudadanía, a la opinión pública lo que-y gustaría ye tener respuestes de Villa y Postigo, que creo, tendríen d'esplicase cuanto antes nesti parlamentu”.

A entrugues de los periodistes sobre les declaraciones del PSOE nes qu'aseguraben qu'hubo un alcuerdu amarráu ente Foru, IX y UPYD pa que ésti postreru presida la comisión d'investigación, Martín sostuvo que son  “tonteríes frutu del nerviosismu de dalgún partíu” y aseguró nun entender esa repartida”, “porque nós nun quixímos tar en nada a pesar de tener propuestes pa presidir, pero entendimos que por tradición parlamentaria tendría de faelo UPYD que foi quien pidió la comisión d'investigación”.