Menu

“La declaración d'oficialidá nel Estatutu d'autonomía ye la última gran oportunidá pa garantizar al asturianu la so supervivencia”. Esta ye la conclusión ne que coinciden Jesús Iglesias, Coordinador Xeneral d'IX d'Asturies, y Ana Cano, Presidenta de l'Academia de la Llingua, dempués de la reunión d'esta mañana na sede de la institución académica.

“La declaración d'oficialidá nel Estatutu d'autonomía ye la última gran oportunidá pa garantizar al asturianu la so supervivencia”. Esta ye la conclusión ne que coinciden Jesús Iglesias, Coordinador Xeneral d'IX d'Asturies, y Ana Cano, Presidenta de l'Academia de la Llingua, dempués de la reunión d'esta mañana na sede de la institución académica.

El voceru parlamentariu d'IX-BA-Verdes na Xunta Xeneral, Jesús Iglesias, aseguró que esta ye una oportunidá pa que la opinión de la mayoría de los asturianos, que ye favoratible al reconocimientu del calter oficial de la llingua, tenga un visu adecuáu tanto nos trabayos de la Xunta Xeneral del Principáu como na posición política de les distintas fuercies que configuran el Parlamentu asturianu como, finalmente, nel testu, que de manera definitiva sía aprobáu.

De nun ser asina, dixo Jesús Iglesias, nun diba haber garanties reales de futuru pal asturianu. “L'asturianu nun ye una reliquia del pasáu, sino una llingua viva, una ferramienta de comunicación que utilizan normalmente los asturianos”, esplicó Iglesias.

IX d'Asturies comprometiose a defender, tanto na ponencia del Estatutu, como na cámara asturiana y, darréu, nel Parlamentu español, la oficialidá del asturianu, amás da-ys puxu y participar en toles movilizaciones e iniciatives que se puedan dar n'Asturies.

Pela so parte, la Presidenta de l'Academia de la Llingua, enmarcó esti alcuentru dientro de les reuniones periódiques que mantienen coles fuercies polítiques y sociales asturianes, en rellación colo que importa a l'Academia, la Llingua. Nesti momentu “clave pa la llingua, como ye la ellaboración de la reforma del Estatutu asturianu”, Ana Cano aseguró nun entender cómo ye posible facer esta modificación ensin reconocer la cooficialidá de la llingua. “L'Estatutu tien que amestar a tolos asturianos, un testo onde todos mos podamos reconocer. Sería mui negativu que dexase a una parte de los asturianos fuera d'esi testu”, aseguró Cano.

La Presidenta de l'Academia aseguró que nun se pue siguir manteniendo, como queda espresao en dalgunas declaraciones, que se ta al favor de la llingua asturiana al tiempu que se niega'l reconocimientu d'oficialdá al asturianu. “Nel marcu del estáu español ye inviable y dafecho impresentable”, dixo la Presidenta de l'Academia. Amás, puntualizó que pa que los derechos llingüísticos de los asturianofalantes se respeten ye necesario entamar por que la declaración d'oficialidá apaeza nel Estatutu d'Autonomía. Esta declaración, nun implica, en mou dalgún, según Ana Cano, la obligatoriedá, pero ye'l primer pasu pa garantizar el derechu de quien la quiera usar.

Tampoco la declaración d'oficialidá ye l'entamu d'un “nacionalismu intransixente, dictatorial”, porque nun ye asina, de neguna manera, esplicó Ana Cano ante los medios de comunicación. “Eso ye impensable dafechu y son disculpes tontes”, piensa la Presidenta de l'Academia de la Llingua. Tampoco se sostién que les mesmes fuercies polítiques defiendan unes cuestiones aquí y otra mui distinta n'otres comunidaes autónomes con llingua propia.