Menu

La nueva plataforma, que s'inscribe nel procesu d'apertura de la formación, va dexar que cualquier persona pueda realizar aportaciones pal so alderique

Orviz asegura qu'IX aspira a tener unes resultancies aceptables y señala que la última encuesta del CIS constata qu'una parte importante del electoráu caltiense fiel y que se recupera tamién parte del mesmu

Izquierda Xunida va abrise entá más pala ellaboración del programa electoral cola puesta en marcha d'una plataforma informática na que cualquier persona va poder plantegar propuestes de forma individual. El coordinador xeneral de la formación, Manuel González Orviz, y la secretaria de comunicación, Mayka Barros, presentaron esta mañana la nueva ferramienta cola que pretende facilitase la comunicación cola ciudadanía.

La inscripción va realizase por aciu una cuenta de facebook, anque la identidá de les persones qu'ufierten les sos propuestes va permanecer oculta sacantes, de forma espresa, decidan lo contrario.

Esta plataforma, que va empezar a funcionar güei mesmo, forma parte de los nuevos mecanismos d'apertura d'Izquierda Xunida, cola participación como ún de los sos elementos clave, tantu no que se refier al procesu de toma de decisiones como d'incidencia política. Ello ye que el coordinador xeneral d'IX, Manuel González Orviz, aseguró güei qu'IX aspira a tener unes resultancies aceptables nos ámbitos municipal y autonómicu, con independencia de la última encuesta del CIS que, esclarió, ta plantegada pa unes elecciones xenerales. Sía que non, el máximu responsable d'IX Asturies, aseguró que la situación  que tamién s'estrái del estudiu ye meyor que la de hai dos o tres meses, con una frenada de la cayida. “Agora paez ser qu'una parte importante del nuesu electoráu caltiense fiel y recuperemos tamién parte d'él. Ende tenemos que trabayar”.

Mayka Barros resaltó la cencellez d'usu de la plataforma, que va tar colgada na páxina web d'IX (www.izquierdaxunida.com) . “Pa poder aportar a la plataforma lo único qu'hai que faer ye rexistrase col facebook personal. Una vegada que te valides, te piden la to contraseña, entres y a partir d'ende puedes meter les tos aportaciones, que nun tienen que ser tampoco bien ellaboraes, depués pa eso yá se va ellaborar el programa. Va ser un buscador bien cenciellu, que te va dexar, al empar que faes una aportación pa lo autonómico, faelo para lo local, si asina lo consideres. Puede buscase per árees, onde va tar democracia, desenvolvimientu, economía ya igualdá y vase a buscar, tamién, por ámbitos, pa los conceyos”.

La plataforma, señaló Barros, “ye una forma más de facilitar l'accesu de la población a los programes políticos. Ye daqué que yá se ta faciendo presencialmente pero que, entendemos que, a día de güei, que tamos toos conectaos al traviés de  los facebooks y los twitters,  ye un dar un pasu más pa que cualquier persona, ensin tener que tar nuna asociación o nuna organización, pueda faer una aportación a Izquierda Xunida”.