Menu

El candidatu d'IX a la Presidencia d'Asturies critica que los socialistes súmense de manera interesada a manifestaciones de sofitu al sector cuando fueron ellos quien punxeron plazu al zarru

Izquierda Xunida pidió güei mesmu la comparecencia del ministru Soria y presentó una Proposición Non de Llei pa que se cumpla l'alcuerdu de consumu autóctonu

El candidatu d'IX a la Presidencia d'Asturies, Gaspar Llamazares, refugó esta mañana en Pola de Siero que'l PSOE asturianu pueda liderar nin defender Asturies. "El Partíu Socialista y Javier Fernández, tán incapacitados pa liderar el cambéu d'aldu que precisa Asturies: un cambéu d'aldu escontra la izquierda y un cambéu d'aldu tamién escontra la rexeneración política frente a la corrupción".

La incapacidá de los socialistes col so candidatu a la cabeza pa defender los intereses d'Asturies queden, a xuiciu de Llamazares, perfectamente simbolizaos nel sector mineru, yá que foi'l PSOE quien aceptó, fatalistamente el zarru de les esplotaciones en 2018. "Tán incapacitados porque, por casu, en relación a la minería, nun fueron capaces de defender la minería a lo llargo de toos estos años; bien al contrariu, punxéron-y plazu al zarru y sicasí agora sumir a una manifestación en campaña electoral".

Gaspar Llamazares reclamó seriedá pos, dixo, "hai que defender el futuru d'Asturies gobernando, y nun hai que sumase a campañes digamos electorales por oportunismu", daqué que, na so opinión ta faciendo Fernández y el PSOE. "El Partíu Socialista nun ta, nestos momentos, capacitáu pa liderar el necesariu cambéu d'esquierdes que precisa Asturies y, Tamién, el necesariu diálogu que precisa Asturies pa un futuru en primer llugar industrial y paralelamente pa un futuru social".

El grupu parlamentariu d'IX rexistró esta mañana'l pidimientu de comparecencia del Ministru Soria pa dar respuesta a los problemes de la minería. De la mesma, esixe na Proposición Non de Llei tamién rexistrada güei adoptar les midíes necesaries pa dar cumplimientu en tolos sos términos a los alcuerdos roblaos pol Ministeriu d'Industria colos Sindicatos Mineros y les Empreses del Sector nel Marcu d'Actuación pa la Minería del Carbón y les Cuenques Mineres pal períodu 2013-2018”.;  De forma específica, dar en dictar les normes precises pa dar cumplimientu esactu al compromisu alcordáu sobre'l consumu de carbón nacional y que se concreta en 6,7 millones de Tonelaes pal 2015, amás de que, teniendo en cuenta lo avanzao del exerciciu y l'acumuladura de carbón per falta de consumu que tuvo de resultes la suspensión d'actividá en delles empreses mineres, venir de forma inmediata a establecer el procedimientu afayadizu qu'algame a la producción de too l'exerciciu 2015.

Esta iniciativa d'IX demanda tamién concretar les midíes que torguen el zarru de la empresa ELCOGÁS y garanticen el so futuru y viabilidá, según Redactar la Orde de “Pagos per Capacidá” que regule l'incentivu a la inversión pa la meyora medioambiental n'instalaciones de producción d'eletricidá a partir de carbón autóctono y que sustituya al RD 134/2010 de Restricciones por Garantía de Suministru, según los allegamientos presentaos polos Sindicatos Mineros, asegurando l'alquisición per parte de les eléctriques de les producciones envaloraes nel Marcu d'Actuación.

A lo último, esixe convocar  de momentu la Comisión de Siguimientu del Marcu d'Actuación pa la Minería del Carbón y les Cuenques Mineres pal períodu 2013-2018.