Menu

El voceru d'IX cree que ye necesariu apostar, non solo por midíes puntuales d'emerxencia, sinón por coordinar polítiques sociales y d'emplegu

Gaspar Llamazares, voceru parlamentariu d'IX na Xunta Xeneral, demandó esta mañana tres la xunta con representantes de la Rede Europea contra la Probeza y la Esclusión Social, alternatives pa lluchar contra la probeza, una actuación que considera “prioritaria”, tantu pa la probeza severa –que toos conocemos, dixo-, como pa la provocada pola crisis.

Al so xuiciu, tal como demanden les asociaciones integrantes de la rede, ye necesario optar por midíes que tienen que ver más con derechos y servicios que namái midíes de beneficencia o puntuales. “De xacíu qu'hai adoptar midíes puntuales pa encetar les situaciones d'emerxencia, pero hai que tener una política social  coordinada con polítiques d'empléu”, aseguró'l voceru d'IX, antes de señalar que tamién  ye relevante que'l Plan d'Inclusión que s'aprobó in-extremis al términu de la llexislatura nun quede en papel moyáu.

Pela so parte, Victor García, presidente de la Rede Europea contra la Probeza y la Esclusión Social, qu'axunta a 28 organizaciones sociales de distintos ámbitos que trabayen con persones en riesgu grave de probeza y esclusión social, resaltó que ye importante qu'haya un pactu social dende les distintes formaciones polítiques pa dar respuesta a estes situaciones, y romper el sensacionalismu, porque dende delles localidaes tan plantegándose acciones puntuales, como abrir los comedores escolares el branu pa responder a la malnutrición infantil cuando, esplicó, “creemos que se debe de dir a una respuesta más integral, con planes locales y autonómicos d'inclusión social onde haya un alcuerdu políticu y coles asociaciones pa responder de forma coordinada y a mediu y llargu plazu en procesos d'inclusión social, non tantu en midíes paliativas d'emerxencia”.

Creemos, aseguró García n'Avilés, que les  families onde deben d'alimentase ye na so casa, tener na so casa los recursos abondos pa soportar tantu los gastos d'enerxía, hipoteca, arriendu, suministros y lóxicamente l'alimentación, tien qu'haber un nivel económicu que pueda soportalo”.

N'Asturies, esplicó qu'esiste'l  salariu social, anque ésti tien d'entainase y tien de responder a les necesidaes básiques de les families. “Entainóse la tramitación pero ye difícil salir de la cronificación del salariu social, porque si tienes un empléu unos meses y tienes que volver pidilo, la tramitación puede volver tardar dellos meses”, concluyó.