Menu

Orviz y Llamazares creen qu'hai marxe p'algamar un pactu y sollerten que dilatar la investidura fadría de la política asturiana una comedia "bufa"

Izquierda Xunida d'Asturies sollertó güei del peligru de convertir l'actividá parlamentaria nuna comedia" bufa” si en cuenta de buscar alcuerdos pal desenvolvimientu d'una axenda política social Podemos termina per sofitar la candidatura del PP, daqué anunciao apocayá por esta formación. La formación fixo amás un llamamientu a Podemos y al PSOE pa que la fueya de ruta yá apautada col PSOE amplíese y sía sofitada poles trés fuerces.

El coordinador xeneral d'IX, Manuel González Orviz, y el voceru parlamentariu, Gaspar Llamazares, reivindicaron esta mañana, tres un alcuentru con entidaes y asociaciones del tercer social, la necesidá de poner en marcha, cuanto antes, midíes que sirvan pa dar respuesta a les necesidaes reales de la xente. “La xente que sufre nesti momentu ta pensando qué va comer güei; mentanto hai otros pensando como enredar”, esplicó González Orviz, pa quien, a estes altures, almite mala xustificación que la formación morada pueda emprestar los sos votos a Mercedes Fernández.

Y ye que, afirmó Llamazares, esperar a estos momentos pa, en cuenta de buscar alcuerdos y negociaciones, dilatar la investidura nun atiende a les necesidaes reales de la sociedá asturiana: “Los tiempos en política son bien importantes. Creemos que tamos nestos momentos n'Asturies nun tiempu de resolvimientu de la investidura y del programa de investidura. IX d'Asturies fixo la so aportación al resolvimientu, tantu de la investidura como del programa. Creemos que si pasa'l tiempu, si averamos al mes d'agostu, lo que nel so momentu foi un apueste pola negociación y por tantu un cambéu en relación a la voluntá del PSOE de investirse col so propiu programa y en minoría, puede convertise en raspiar el ridículu. Nun queremos que'l principiu d'esta llexislatura sía'l ridículu, nin una comedia d'enriedu, nin xuegu de tronos.  Creemos que la situación d'Asturies ye seria y que los partíos políticos tenemos la obligación d'apurrir idees y propuestes”

Llamazares encamentó no que denominó hasta “un llamamientu inclusive angustiosu” al restu de les fuerces que se consideren de la xente pa que pongan enriba de la mesa les sos propuestes y pa qu'apuesten pola negociación. “Esi ye'l nuesu planteamientu y nun vamos abdicar del nuesu oxetivu que ye un gobiernu ampliu, de cambéu y de xiru a la izquierda n'Asturies. Primer pasu una investidura con una fueya de ruta clara de cambeos.  Tamos comprometíos, los nuesos militantes tán votando y creemos que'l restu de fuerces tienen que tamién afaese a esta responsabilidá, tienen que responder a lo que se llama responsabilidá política. Asturies nun ta en condiciones d'una comedia d'enriedos, nin en condiciones de convertir la investidura nun fechu risible”.

Manuel González Orviz quixo poner un símil futbolísticu pa esplicar lo que ta asocediendo n'Asturies y la posición qu'adoptó'l voceru de Podemos na Xunta Xeneral, Emilio Llión: “Ente la Colorada y Alemaña ta escoyendo Alemaña, ente la política social y los problemes de la xente ta emprestando votos a lo que ye la representación palmaria de les polítiques neolliberales y de retayos que ye'l Partíu Popular. Apueste per Alemaña. Por tanto, yo creo qu'amás tienen un conceutu de la política que yo considero altamente irresponsable, porque cuando les fuerces polítiques tán aplazando decisiones tán tamién aplazando midíes que tienen que llegar a la xente y les midíes que plantegamos equí son claramente sociales”.

Llamazares y Orviz coincidieron nel so analís sobre les posibilidaes reales esistentes nestos momentos pa que l'alcuerdu alcanzáu por IX y PSOE fáigase estensivu a Podemos, dada la gran semeyanza ente planteamientos. “Si hubiera voluntá, taría fácil. Yo fixi la comparanza de la propuesta del 14 de xunetu de Podemos col principiu d'alcuerdu ente IX y la FSA y el nivel de coincidencia ye peralta: por tanto, si Podemos quier ampliar l'ambición del alcuerdu poder faer si quier”.

A mayores, el voceru d'IX na Xunta Xeneral remarcó'l cambéu de la formación morada qu'agora plantega tamién la necesidá d'un gobiernu fuerte, daqué reivindicáu por Izquierda Xunida dende'l 25 de mayu. “Si Podemos quier amás comprometese con un Gobiernu d'amplia base, puede facer si quier: tien propuestes y tien amás fuerces polítiques coles que faelo. Nun tien más que tener voluntá y tener compromisos”, afirmó Llamazares para quien la disyuntiva abierta agora ta ente optar pol compromisu o pol enriedu.