Menu

Llamazares sostien qu'IX nun apuesta pol bloquéu, sinón pol cambéu y la esixencia d'un presupuestu social, d'izquierdes

IX apuesta porque Asturies cunte con un presupuestu pal próximu añu, 2016, y esplica al traviés del so voceru na Xunta Xeneral, Gaspar Llamazares, les premises sobre les que tien d'asitiase'l presupuestu. “Nós nun resignamos, nun apostamos pol bloquéu, apostamos pol cambéu y pola esixencia nun presupuestu social, qu'en la nuesa opinión ye'l que precisa Asturies”, alvirtió'l voceru na vez d'entrugues al presidente, Javier Fernández.

Llamazares estableció les prioridaes d'IX nos servicios públicos, ente ellos la política de rescate social sobremanera'l salariu social porque ye'l fechu diferencial d'Asturies al respective de otres comunidaes autónomes, casi al nivel del País Vascu y Navarra, y que definió como “un sosten bien importante”. A xuiciu de Llamazares, tien de producise tamién una política económica qu'incorpore a Asturies a la recuperación, con inversiones caracterizaes escontra la sostenibilidá económica, ambiental, la investigación y el desenvolvimientu. Otra pilastra tien de ser un calendariu ciertu de recuperación pa los funcionarios, non solamente de la paga estraordinaria, sinón de los derechos sociales y de representación de los funcionarios públicos.

El próximu presupuestu a xuiciu del voceru d'IX tien que tener unos ingresos basaos, en que quien más tenga más pague, y eso “significa nun ser veleidosu al respective de dalgunos los impuestos actuales y nun cayer nos erros de saltu”, alvirtió. Llamazares aseguró que nun hai erru de saltu –nel impuestu de sucesiones-, n'Asturies, sinón que lo qu'esiste ye la protección de les clases medies, “porque quien tien un patrimoniu de 600.000 o 800.000 euros, teniendo en cuanta a la familia del baby boom, nun ye un probe, que son el @5% afectaos pol impuestu de sucesiones n'Asturies”. “Queremos unos impuestos progresivos y la llucha contra'l fraude”, añedió.

IX piensa qu'Asturies tien una oportunidá pal compromisu y la esixencia pa un presupuestu dende la izquierda . “La prórroga presupuestaria sería bien mala, sería la prórroga del alcuerdu col PP y una prórroga del retayu presupuestariu, na que sería más fácil l'arbitrariedá y discrecionalidá”, esplicó'l voceru d'IX. Les declaraciones del presidente de la FADE, dixo Llamazares, demuestren que tamos ente'l bloquéu y el fatalismu y dalgunos yá dan per descontada la prórroga y piden responsabilidaes en clave electoral.

Na so respuesta, Javier Fernández aseguró que les sos prioridaes, que respuenden al alcuerdu de la FSA ya IX, van ser la defensa persones más vulnerables, el caltenimientu de los servicios públicos d'Asturies ya l'impulsu al emplegu y al desenvolvimientu social d'Asturies. “Pol bien de tolos asturianos espero que la cámara tea al altor pa qu'Asturies cunte con un bon presupuestu”, aseguró'l presidente en respuesta a Llamazares.

Fernández amosóse convencíu de que'l sistema tributariu tendría de ser más progresivu de lo que ye, anque sicasí, argumentó qu'esiste un erru de saltu nel impuestu de sucesiones que tien que correxise.