Menu

Llamazares denunció que les inversiones reales del Gobiernu de Rajoy n'Asturies tienen una execución del 20% a finales de xunu

La Xunta Xeneral del Principáu esixe al gobiernu del estáu que termine la Variante de Payares  primero qu'acabe l'añu. Tolos grupos parlamentarios de la cámara votaron a favor de la Proposición Non de Llei d'IX, defendida por Gaspar Llamazares, pa cuntar  con un ferrocarril del sieglu XXI pa una Asturies del sieglu XXI. Llamazares denunció que'l gobiernu de Rajoy retayó los presupuestos pal próximu añu y en 2015 cuenta con una execución presupuestaria baxísima. A 30 de xunu les inversiones reales n'Asturies tienen una execución del 20%, el farolucu coloráu de la inversión por comunidaes xuntu con Baleares; la execución del presupuestu d'Adif  la execución, na mesma fecha, yera del 25,7%, ente que la del Ministeriu de Fomentu pa la comunidá autónoma ye entá menor, del 17,3%, la tercera más baxa xuntu con Murcia y Canaries, y casi la metá que la media estatal.

Llamazares amosó la esmolición poles declaraciones del gobiernu, que nun afita plazos pa la culminación, sinón que sostien ambigüedaes, y el mieu pola execución presupuestaria porque los sos datos son relevantes. El voceru d'IX alvirtió que con estes cifres d'execución la obra va terminar más allá del próximu añu, el 2016. Tamién espresó la so medrana porque hai partíos que nel restu del estáu ponen en dulda l'alta velocidá y la finalización de la Variante de Payares.

El voceru d'IX bromió güei na sesión del parlamentu asturianu sobre la necesidá d'avisar a Isidro Fernández Rozada, senador del PP, pa movilizase nes cais d'Asturies a favor de la Variante, tal como asocedió nel añu 1993 cuando se constituyó la Plataforma pro Variante de Payares. “Pasaron 22 años y esto paez el cuentu de nunca acabar”, concluyó'l diputáu d'IX.

L'últimu puntu de la Proposición Non de Llei encamienta tamién al conseyu de gobiernu a que realice xestiones urxentes al máximu nivel ante'l presidente del gobiernu d'España en visu a dar cumplimientu a estos oxetivos.