Menu

Iglesias reclama los plazos d'execución de la Variante de Pajares hasta Xixón
El Coordinador Xeneral d'IU subraya que les infraestructures n'Asturies siguen siendo un instrumentu de captación de votu

Iglesias reclama los plazos d'execución de la Variante de Pajares hasta Xixón
El Coordinador Xeneral d'IU subraya que les infraestructures n'Asturies siguen siendo un instrumentu de captación de votu

Jesús Iglesias, portavoz del grupu parlamentariu d'IU-BA-Verdes na Xunta Xeneral del Principáu y Coordinador Xeneral d'IU d'Asturies, refiriose esta mañana, en rueda de prensa, a les declaraciones “marcadamente ellectoralistes” feches na fiesta minera de Rodiezmo pol presidente del Gobiernu, José Luis Rodríguez Zapatero.

Pal Coordinador d'IU d'Asturies ye obvio que'l prósimu cursu políticu va tar definíu pol tinte ellectoralista, lo que resulta inevitable por un llau, pero “nun ye bueno pa la vida política española ni asturiana”. Ente los compromisos más destacaos ayeri por Rodríguez Zapatero alcuéntrase'l d'una importante xuba de les pensiones, una decisión “buena”, a xuiciu d'Iglesias, pero “non elegante” nel últimu añu de llexisllatura y a pocos meses d'unas elecciones. “Esti gobiernu, como práuticamente la totalidá de los gobiernos de la Democracia, utilizaron la Seguridá Social -que ye de todos- como un instrumentu de captación de votu”, aseguró'l portavoz del grupu parlamentariu d'IU-BA-Verdes.

Jesús Iglesias tamién falo d'otru de los asuntos pendientes n'Asturies: les infraestructures. L'aprobación de la llicitación del tramu de l'autovía del Cantábricu ente Unquera y Llanes y los correspondientes plazos d'execución faen pensar de que “de manera casual” les primeres máquines van entamar a trabayar un o dos meses enantes de los comicios xenerales. “Los asturianos merecémonos un mayor respetu de los gobiernos nacionales a la hora de que se satisfagan les nueses necesidaes n'infraestructures. N'Asturies, les infraestructures fueron y siguen siendo, colos diferentes gobiernos, un instrumentu de captación de votu”, aseguró Jesús Iglesias.

De l'alta velocidá n'Asturies les declaraciones de Zapatero fueron escases, poco más de lo que ya conocíamos. Zapatero namás esplicó que l'Alta Velocidá va llegar a Asturies, una vieya noticia, pero nun comprometió dengún plazu. Colos datos que güei tenemos, dixo Iglesias, sabemos que l'alta velocidá va llegar ente'l 20 y 22 d'avientu a Barcelona, Málaga y Valladolid. El tramu que va afectar a Asturies, el de Valladolid, va inaugurase probablemente el 22 d'avientu, pero sigue sin tar claro cuando va finar el tramu Valladolid-León y cuándo'l tramu dende los túneles de Pajares a Xixón y con qué trazáu. El Coordinador Xeneral d'IU d'Asturies recordó que la coalición reivindicó, dende va munchos años, que la execución de la variante del Guadarrama y la de Pajares fuera simultánea. Esta petición, fecha axuntadamente polos integrantes del Foru pola Alta Velocidá nel Norte, nun ta cumplía: la Variante del Guadarrama va inaugurase n'avientu y, ensin embargu, inda queden un númberu indetermináu d'años pa que se termine la conesión d'Asturies cola Alta Velocidá.

Con respectu al peaxe del Huerna, anque nun ta totalmente claro, la bonificación del 30% vixente pal tresporte profesional va a xeneralizase al conxuntu de los usuarios de l'autovía del Huerna. “Si eso ye asina, paez que queda superada la ocurrencia del inefable Álvaro Cuesta na que dicía que la baxada diba ser namás pa los asturianos. Supongo que diba ser un arranque abertzale qu'evidentemente nun podía tener enganche llóxicu nuna política d'estáu que'l gobiernu de la nación tien que desarrollar, tamién n'Asturies”, dixo'l portavoz parlamentariu d'IU-BA-Verdes.

La pregunta qu'agora fai IU d'Asturies ye cuántes ellecciones autonómiques más van facer falta pa que'l gobiernu de Zapatero cumpla la so promesa ellectoral: la supresión del peaxe del Huerna.