Menu

El coordinador d'IX y candidatu d'Unidá Popular reclama un llinguaxe que non edulcore los asesinatos de muyeres

El coordinador xeneral d'IX y candidatu al congresu d'Unidá Popular, Manuel Gonzalez Orviz, reclamó güei que se dea a la violencia machista igual tratamientu que se dio al terrorismu, de la que pidió más recursos pa protección de les víctimes, educación y formación de conciencia.

“Hai que da-y el tratamientu que se-y dio al terrorismu. Tamos falando d'un fenómenu, el del machismu, que lleva más muyeres asesinaes qu'el mesmu terrorismu. Y por tanto, si al terrorismu consideróse-y un problema d'estáu y utilizáronse midíes escepcionales, na llucha contra la violencia machista hai qu'utilizar tamién midíes escepcionales y nun quepe, nesti casu, llamentos, cuando se producen estos sucesos sinón qu'hai qu'enfocalo dientro d'esi plan estatal, con variantes tamién nel ámbitu autonómicu, onde se destinen recursos y fáiganse polítiques especialmente nos ámbitos de la concienciación a les nueves xeneraciones y educaciones, con un nivel de tolerancia cero a esti tipu de conductes”.

Manuel González Orviz, mientres la concentración de repulsa a los últimos asesinatos que se desenvolvió güei en frente a la plaza del Conceyu d'Uviéu, fixo tamién un llamamientu a la claridá nel llinguaxe cuando se fala d'esti tipu de sucesos. “Hai que llamar a les coses pol so nome: nun ye una muyer muerta, ye una muyer que foi asesinada, y nun ye un presuntu culpable, sinón un asesín confeso”.