Menu

El coordinador xeneral d'IX y nº3 de la llista al Congresu destaca la importancia d'IX pa la defensa de cuestiones como'l carbón

El coordinador xeneral d'IX Asturies y nº 3 na llista de Xuníos Podemos al Congresu, Manuel González Orviz, apostó güei por aprovechar estes elecciones pa desallugar les polítiques de la derecha de la Moncloa. “Per primer vegada, tenemos una oportunidá, dende'l referéndum de la OTAN, de que la izquierda alternativa sía mayoría y, por tanto, tenemos qu'actuar con responsabilidá”. González Orviz atayó asina les tensiones pola confección de la llista de la coalición, asegurando que, ensin dexar de mirar al retrovisor, la mirada tien que tar nel horizonte”. El candidatu d'IX-UP aludió a les declaraciones de la pasada selmana d'Íñigo Errejon na Felguera al respective de que ye imprescindible conformar una mayoría de cambéu daqué que, afirmó, comparte: “ye momentu de contribuyir a una mayoría de cambéu; ye momentu de sumar non solamente a los que tamos nesti momentu en Xuníes Podemos al cambéu, de sumar otres fuerces que son necesaries pa tener una mayoría nesti país”.

IX-Unidá Popular, señaló'l so candidatu, "cerrara files, claramente, pa favorecer la unidá” nun procesu de calter federal. Eso sí, dixo, “destacando la importancia y la necesidá de la presencia d'Izquierda Xunida nesi parlamentu pa toes aquelles partes del programa que nun taben na intersección que s'alcordara nel ámbitu federal”. Orviz facía referencia a elementos  como la defensa del carbón autóctono, nel que la so formación apuesta de forma clara pol so caltenimientu como sector estratéxicu.

Lo importante, tres l'alcuerdu, tien que ser ganar, empezando pol tercer diputáu. “Ye imprescindible ganar n'Asturies y ganar al Partíu Popular. Dicir el 20 d'avientu y siguir diciendo güei: el 20 d'avientu demostremos que'l diputáu que pierde la izquierda ganalu la derecha y nesti momentu'l diputáu que va ganar esta coalición tien que perdeku'l Partíu Popular. Por tanto, damos por zarraos los tiempos de discutiniu”.

Izquierda Xunida Unidá Popular, enfatizó González Orviz, llega a la coalición con voluntá d'estabilizar y, tamién, d'apurrir lo que denominó “el filo coloráu”. “Apurrimos hestoria y tenemos trayectoria personal y política tamién”.

Al respective de la campaña, anque inda ta por definir el modelu cooperativu ente toles fuerces que conformen la coalición, Manuel González Orviz avanzó qu'el so oxetivu, na parte estremada de la campaña, va ser asitiar les necesidaes d'España y Asturies y les soluciones. Hai que falar, señaló, de rexeneración democrática daqué que, al so xuiciu, ye imposible col PP nel Gobiernu. De la mesma, cuestiones como la tarifa eléctrica o'l futuru d'Alcoa tienen qu'entrar na axenda de prioridaes, nes que tamién incluyó la sostenibilidá del sistema de pensiones, pero tamién pensiones, nueves, equidad. De too lo que, a última hora, dixo, “ye'l nuesu corpus ideolóxicu”.

Qué va pasar a partir del 26 de xunu ye falar de política ficción, tantu pal contestu español como autonómicu. Sía que non, González Orviz señaló que ye imprescindible sumar. “Izquierda Xunida, falo como Izquierda Xunida-Unidá Popular nel Parlamentu, qué fixo: trató de forzar una mayoría de cambéu nel Parlamentu y ye lo que tenemos que faer. Y eso que nós dicimos repitíalo Errejón esti día en La Felguera. Hai que sumar a la mayoría de cambéu 175 diputaos. Paez más lóxico que se sumen a esos 175 diputaos fuerces provenientes del PSOE que d'otru ámbitu. Pero, n'último casu, la decisión va tar n'el mesmu Partíu Socialista que va tener qu'optar si apuesta por una mayoría de cambéu o por consolidar al PP y Ciudadanos que, sol mio puntu de vista, nun son fuerces de cambéu”. Nesti sentíu, esplicó, los votantes del PSOE tienen que saber que la fuerza real de cambéu ta en Xuníos Podemos.

Al respective d'Asturies, Manuel González Orviz, amosóse convencíu de qu'un cambéu nel contestu nacional, con nueves aliances de progresu tendríen ensin dulda tamién consecuencies nel panorama autonómicu. “Na política y na vida la intelixencia ta en saber asimilar lo qu'hai y afaese a les nueves situaciones”. Nesti sentíu, el coordinador xeneral d'Izquierda Xunida apostó por llograr mayoríes de cambéu que dexen la puesta en marcha de polítiques progresistes. “Nós nun queremos sumar 14, queremos sumar 28 siempres porque na Xunta Xeneral del Principáu, pa que salgan les iniciatives tienen que salir 23. Ende, tenemos una llínea de trabayu clara. El grupu parlamentariu cuenta col total respaldu de la dirección y creo qu'hai que faer apuestes importantes pa llograr mayoríes”.

El candidatu d'IX-UP compareció acompañáu por miembros de la candidatura de la formación como Leticia Gil -númberu 5 al Congresu-, Gema Álvarez -suplente al senáu- Y otros miembros de les llistes del pasáu 20 d'avientu como Faustino SabiO, Camilo Sousa, Roberto Ruiz y Pilar Muñiz.