Menu

Jesús Iglesias, candidatu a la presidencia del Principáu d’Asturies d’IX-BA-Verdes participó xunto a Alfredo González, candidatu a l’alcaldía d’Ayer, nun repartu publicitariu en Morea.

Jesús Iglesias, candidatu a la presidencia del Principáu d’Asturies d’IX-BA-Verdes participó xunto a Alfredo González, candidatu a l’alcaldía d’Ayer, nun repartu publicitariu en Morea. Los ayeranos pudieron comprobar dalgunos de los fechos nos que se tresformaron los proyeutos presentaos por IX d’Ayer, ente ellos el de Sotiellu, onde se construyirá una residencia pública d’ancianos y un centru de día, 101 viviendes públiques o con dalgún grau de proteición, una cai nueva que va sirvir de paséu y de comunicación rodada ente Caborana y Morea, 101 places d’aparcamientu pa les viviendes y 125 places d’aparcamientu esterior, asina como zones verdes y el derribu del polideportivu pa construyir otru bloque de vivienda cuando’l complexu deportivu con piscina cubierta se termine en Caborana. Esta actuación, tal como sorrayó’l candidatu llocal, nun ye una promesa eleutoral, como la qu’otros grupos presentaron pa la zona. Nes próximes selmanes la Conseyería de Bientar Social y Vivienda, dirixida por IX, va proceder a baltiar los edificios de maestría y el vieyu institutu, mientres se redauten los proyeutos d’urbanización y el de la residencia pública d’ancianos, asina como’l proyeutu téunicu de la primer fase de viviendes sociales (65 viviendes). Del mesmu mou, la Direición Xeneral de Vivienda va ceder los baxos del edificiu de viviendes sociales p’asitiar nos sos 1.000 metros cuadraos el Centru Xuvenil/Hotel d’Asociaciones.

Jesús Iglesias y Alfredo González tamién punxieron de manifiestu un compromisu incumplíu. El proyeutu del tren-tran que plantegó’l Gobiernu del Principáu nun recueye una partida presupuestaria d’un millón d’euros del Ministeriu pa l’ampliación del ferrocarril hasta Felechosa que taba incluyida nel presupuestu de 2006 y agora desapaeció nos d’esti añu. “Pedimos una rempuesta a los socialistes porqué esi millón d’euros sirviere pa entamar el proyeutu y agora acabamos de retrasalo polo menos dos años más”, aseguró González. Jesús Iglesias llamentó la oportunidá perdida con  esta partida d’un millón d’euros que podía tenese incorporao al proyeutu del tren-tran.

Dambos candidatos tamién pidieron un estudiu exhaustivu pa la estación de Fuentes d’Inviernu, sobre too pa garantizar la proteición pasiva y activa tanto na propia estación como nos accesos al Puertu San Isidro. Esti estudiu tendría de concretase dempués nun Plan Integral de Seguridá nel que participen les tres conseyeríes implicaes: Seguridá Pública, Cultura ya Infraestructures.