Menu

Marina Albiol y Ángela Vallina sofiten un pidimientu de Proem-Aid pa modificar la Directiva de Facilitación y protexer a aquellos que trabayen nel Mediterráneu salvando vides, que por un vacíu llegal arriesguense a ser deteníos y enxuiciaos por tráficu de persones

Les eurodiputaes d'Izquierda Xunida Marina Albiol y Ángela Vallina solicitaron esti martes un cambéu na Directiva de Facilitación pa evitar qu'aquellos voluntarios que trabayen nel mar o nes fronteres salvando la vida de les persones abellugaes puedan ser deteníes y procesaes, tal que asocedió en xineru del añu pasáu con trés bomberos de l'asociación Proem-Aid que trabayaben nel Exéu y que presentaron güei un pidimientu ante'l Comité de Pidimientos de la Eurocámara.

Aquelles detenciones y otres munches que se producieron dende entós sofítense nun vacíu llegal de la mesma lexislación comuñal, que dexa que se criminalice a equipos de persones como esti, que se xueguen la vida a diariu de forma voluntaria pa evitar qu'haya más muertes nel Mediterráneu.

Estos voluntarios, dixo Vallina –que ye coordinadora del GUE/NGL nesta Comisión-, “salven vides onde les instituciones y los gobiernos nun lleguen o nun quieren llegar”, polo que provoca “indignación y plasmu” les hestories de persones acusaes y a espera de xuiciu por rescatar a aquellos que fuxen d'una muerte segura nos sos países d'orixe”.

Les polítiques de la UE que dexen “que muerran miles de persones a les puertes de les nueses fronteres afogaes o de fríu, que les muyeres sían violaes nel tránsitu, son vergonzantes”, denunció Vallina, antes d'aportunar en que resulta “inadmitible” que los voluntarios y voluntaries “que faen un llabor d'asistencia humanitaria sían enxuiciaes”.

Estes, “dediquen el so llabor a salvar a persones ensin preguntar cuál ye la so nacionalidá o'l so pasáu”, o “¿qué ye, que cuando rescatamos a un neñu nel mar preguntámos-y si vien d'una patera o d'un cruceru?”, preguntóse. La eurodiputada recordó que “el derechu a recibir asistencia humanitaria ta al mesmu nivel llegal que la obligación d'emprestala per parte de los que tán en condiciones de faelo y que los que nun lo faen pudiera considerase delitu” y pidió que siguiera abierta'l pidimientu hasta que se retiren los cargos contras los voluntarios.

Albiol, que pudo conocer en Lesbos mientres una visita hai xusto un añu a los voluntarios enxuiciaos de Proem-Aid, esplicó que lo que la UE tendría de empezar por faer “ye estima-yos el so llabor”, una y bones “la cifra de 5.000 persones muertes dende 2016 fuera peor si non fora por persones como ellos y otros voluntarios y voluntaries”.

La vocera d'IX nel Parlamentu Européu criticó'l doble discursu de los grandes grupos parlamentarios, “qu'anque depués equí los sos discursos nun cuadren colo que voten nel Plenu, sofiten les polítiques criminales de les instituciones comuñales, que cerraron les fronteres a les persones que fuxen de guerres, fame y probeza, roblaron un alcuerdu con Turquía pa deportar a cientos de miles de persones y que dexen qu'aquellos que tán nes fronteres muerran de fríu”.

Eses instituciones qu'apliquen “polítiques criminales” son precisamente l'antítesis de “les organizaciones sociales, entidaes, persones voluntaries que, salvando vides, tán siendo injustamente criminalizaes, como los compañeros de Proem-Aid”.

Albiol pidió a la Comisión de Pidimientos presentar una entruga oral a la Comisión Europea con alderique nel Plenu, por que pueda valorase la posibilidá d'acabar cola criminalización de les organizaciones de voluntarios y voluntaries que trabayen nel mar.

Vallina, pela so parte, solicitó que se redacte una carta al Conseyu y a la Comisión pa dar en la corrección de la Directiva” y dexar “perfectamente claro que les persones qu'ufierten ayuda y asistencia humanitaria nun pueden ser criminalizaes pol so llabor”.