Menu

Frenar la especulación urbanística y l'"acosu" a la ganadería, aumentar el númeru de viviendes pa los habitantes de Llanes y meyorar la calidá de vida de los vecinos de los pueblos del conceyu: son los tres exes colos que va trabayar dende agora Javier Ardines, candidatu d'Izquierda Xunida a l'alcaldía de Llanes.

Javier Ardines, candidatu d'IX a l'alcaldía, mostróse críticu colos proyectos del Auditoriu y la implantación de la zona azul

Frenar la especulación urbanística y l'”acosu” a la ganadería, aumentar el númeru de viviendes pa los habitantes de Llanes y meyorar la calidá de vida de los vecinos de los pueblos del conceyu: son los tres exes colos que va trabayar dende agora Javier Ardines, candidatu d'Izquierda Xunida a l'alcaldía de Llanes.

El candidatu a l'alcaldía de Llanes amuesóse tamién esmolecíu pola xestión actual del turismu, “la pita de los Güevos d'oru”, na comarca del Oriente d'Asturies. “Al ritmu que vamos, cola especulación urbanística y directamente venceyada con ella, l'acosu a les esplotaciones tradicionales ganaderes, podemos acabar con munchos de los eslóganes colos qu'agora se publicita'l paraísu natural”, aseguró Ardines na so presentación pública, acompañáu por Jesús Iglesias, Coordinador Xeneral d'IX y candidatu a la presidencia del Principáu. La superficie pública de Llanes ye actualmente de, aproximadamente un 50% del conceyu, alredor de 13,000 hectárees, que “sistemáticamente” se tán vendiendo pero non pa viviendes de primer residencia, sinon pa xalés y segundes residencies y ensin que los beneficios reviertan directamente sobre los pueblos.

El candidatu a l'alcaldía de Llanes foi tamién críticu colos proyectos anunciaos dende la Casa Conceyu: la implantación de la zona azul los 365 díes del añu y el Palaciu de Congresos o Auditoriu, que si bien ye ciertu que puede ayudar a desestacionalizar el turismu, va potenciar solamente los grandes establemcimientos de la zona y non los del Valle de San H.urde, el Valle d'Ardisana, amás de suponer un “derroche” de 3,6 millones d'euros pa les arques públiques cuando munchos pueblos nun tienen saneamientu. Javier Ardines mostróse d'alcuerdu cola puesta en funcionamientu d'esta infrastuctura siempre y cuando otres administraciones financien gran parte del coste del auditoriu o del palaciu de congresos.

Pela so parte, Jesús Iglesias, Coordinador Xeneral d'Izquierda Xunida d'Asturies, aseguró qu'IX en Llanes tien como obxetivu entamar a condicionar de manera definitiva la política municipal, pa priorizar qu'el desendolcu urbanu seya otru y ésti satisfaga les necesidaes de vivienda pa que los ciudadanos puedan exercer esti derechu reconocíu na Constitución. “Depués de normnalizar la situación interna, IX de Llanes preséntase como una organización cohesionada y comprometida cola realidá del conceyu”, dixo Jesús Iglesias ente los militantes llaniscos.

Jesús Iglesias recordó que la última vegada que visitó Llanes foi pa presentar una enmienda al tramu La H.unquera-Llanes de l'autovía del Cantábricu. Agora puede anunciar qu'IX y PSOE algamaron, na Xunta Xeneral, un alcuerdu pa que l'Hospital de Les Arriondes dea'l pasu definitivu a la so incorporación a la rede pública.