Menu

Ramón Argüelles reprocha al Conseyeru d'Industria que pida “marxe” d'enfotu pal nuevu Ministru tres años d'incumplimientos del Partíu Popular

L'Alcaldesa de Riosa ironiza y niega qu'hubiera xuntes con Conceyos, siquier, “con alcaldeses”

Izquierda Xunida esixó güei al Gobiernu d'Asturies que dexe de mirar pa otru llau y que reclame de forma firme y clara al executivu Central que cumpla los sos compromisos para coles cuenques mineres. El coordinador xeneral de la formación, Ramón Argüelles, reprochó güei al conseyeru, Francisco Blanco, que, a estes altures, pida marxe d'enfotu pal nuevu ministru d'Industria, en cuenta d'esixir, d'una vegada por toes que se desbloquien les inversiones.

“Paez que la iniciativa nestos casos llevaramosla nós, llevala Izquierda Xunida pola inacción d'un Gobiernu que paez de compromisu coles cuenques mineres pero con un plan que salió del 2013-2018, que tamos en 2017 y nun tien nengún deber fechu”.  A mayores, Ramón Argüelles aseguró que nun son tiempos d'esperar cambeos nin el cumplimientu d'unos compromisos largamente traicionaos, sinón d'esixir. “Tenemos que reclamar tolo que se debe, que lo ganamos nos xulgaos, más esti plan, pero, claro, el Principáu tien que poner de la so parte”.

La Xunta Xeneral del Principáu encetó güei en sesión Plenaria una interpelación d'Izquierda Xunida al Gobiernu pa qu'esplicara les polítiques xenerales de desenvolvimientu de les cuenques mineres, nel marcu del Plan del Carbón 2013-2018. Pa sorpresa del públicu, ente los que taben Ramón Argüelles, l'alcaldesa de Riosa, Ana Díaz, y una nutrida representación de representantes d'IX en conceyos mineros de toa Asturies, el Conseyeru Blanco amosóse casi como valedor del Ministru d'Industria y, magar reconociera los incumplimientos del pasáu, atrevierase a pidir a IX que baxara la presión por culpa de que'l nuevu ministru yera nuevu nel so cargu.

La intervención del representante del Gobiernu d'Asturies nun foi bien recibida ente'l públicu asistente, al considerar que trataba d'estenar balones al PP, al propiu PSOE, pero que nun apurría nenguna vía real pa rellanzar los planes de reactivación de les contornes mineres. La rexidora de Riosa aseguró tar “plasmada”, n'escuchando que'l Conseyeru dicía habese aconceyao con sindicatos y Conceyos. “Tengo que dicir que con Riosa, cola Alcaldesa de Riosa, en nengún momentu. Nun sé si ye qu'a lomeyor coles alcaldeses nun s'axuntó y solo axuntó con alcaldes”, ironizó.

Respectu al balón d'osíxenu pal ministru, Ana Díaz foi contundente: “creo que yá tendimos bastantes manos y a quien hai que tender la mano ye a les cuenques, a los mineros”. Y ye que, añedió l'alcaldesa riosana, nun se trata d'un Gobiernu nuevu, sinón d'un partíu que lleva gobernando n'España dende hai enforma tiempu y con unes polítiques contra la minería que dieron como resultáu la situación actual.

Pa sorpresa d'IX, Blanco trató de amortiguar los golpes al PP, xustificando una nueva tregua en base a que'l nuevu xefe del departamentu fuera, prácticamente acabante nomar.