Menu

El Conseyeru d'Emplegu, Industria y Turismu pidió a IX –na oposición propuestes pa evitar la inseguridá xurídica nos planes d'emplegu municipales dempués de reconocer que l'actual convocatoria “ta a la llende llegal” y qu'incorporaron tolos cambeos llegales que podíen.

Asina respondía a la entruga del diputáu d'IX, Ovidio Zapico, que lu apelaba sobre les ayudes al desenvolvimientu de Planes Locales d'Emplegu que, nestos momentos, son un “modelu escosíu” dada la inseguridá xurídica reflexada en numberoses sentencies que, van suponer na redolada a 10 millones d'euros pa los conceyos asturianos, como calcula IX.  Francisco Blanco, el  Conseyeru d'Emplegu, con plenes competencies, pide soluciones al grupu parlamentariu d'IX.

Ovidio Zapico nomó de continuista la convocatoria d'anguaño y adelantró que los planes convocaos anguaño van tener una execución enforma menor que n'años anteriores, amás de que dalgunos de los principales conceyos de la rexón, yá nun optaron a los mesmos.  El Plan anterior, como sorrayó Zapico, tuvo una execución del 80%, quedaron ensin gastar 1,5 millones de los 7,4 destinaos a planes d'emplegu. El diputáu preguntó cuántu se va a executar anguaño ensin llograr respuesta del Conseyeru.

El diputáu d'IX demandó a la Conseyería d'Emplegu midíes urxentes pa la próxima convocatoria qu'ufierte más seguridá xurídica, sofitándose nos servicios xurídicos del Principáu, que tienen d'estudiar y garantizar que cada programa tenga sustantividad propia y escarecer de calter estructural . Nesti sentíu Zapico reclamó una xornada técnica pa dar solución a un problema que ye alministrativu, non políticu, dempués de la eliminación del contratu d'insertamientu llaboral.

Ovidio Zapico tamién pidió a Francisco Blanco que valorara cómo aumentar les modalidaes actuales. Zapico considera que podría ser una opción contemplar como nuevos empleadores a les entidaes sociales ensin ánimu d'arriquecimientu o empreses y organismos públicos, nunca empreses privaes;  ampliar la duración de los contratos pa buscar la flexibilidá y evitar la rixidez actual; amenorgar la fienda salarial ente trabayadores de los planes d'emplegu y trabayadores municipales.

Pela so parte, el Conseyeru esplicó que tendría de camudase la normativa estatal y convidó “al so grupu parlamentariu y al míu” a faer una propuesta nel Congresu.