Menu

Izquierda Xunida d'Asturies y la Plataforma pola Educación Pública d'Asturies fixeron güei un llamamientu pa una participación masiva na xornada de fuelga xeneral convocada en frente a los retayos nel sector y en defensa del sistema públicu.

La movilización surde como una respuesta a les polítiques regresives llevada a cabu polos gobiernos del PP y pretende convertise nun motor pa la derogación de la LOMCE y un frenu ante l'amenorgamientu del presupuestu. Pal coordinador xeneral d'IX Asturies, Ramón Argüelles, la fuelga ta dafechu xustificada, más porque, tres años de polítiques recesives, la defensa de lo público ye entá más acuciosa porque, dixo, ye entá más importante qu'antes: “Si queremos que sía pa toos y toes lo mesmo, tenemos que garantizar l'accesu, dotar de más beques qu'antes, y non menos”. Y ye que, resaltó Argüelles, dende 2012, n'España, retayáronse 50.000 emplegos n'educación, ente docentes y alministrativos, de la que la población escolar, dende esi mesmu añu, aumentó en 300.000 persones.

“A la fin –reprochó'l coordinador xeneral d'IX Asturies- lo que ye un derechu, paez que va ser una obra de caridá ya Izquierda Xunida va engarrase al llau d'estes organizaciones de los alumnos y de la sociedá pa que nun sía una obra de caridá, sinón un derechu que garantice que les nueses futures xeneraciones tienen una formación que ye lo mínimu que podemos da-yos”.

Pal máximu responsable d'IX, al pie de la esixencia de más recursos y medios humanos y materiales, ye imprescindible que'l sistema públicu, d'una vegada por toes, desaposiar de cualquier matiz confesional, como parte integrante del mesmu. “Sicasí vemos que los neños tamién de la educación pública tienen una materia que nun ye, precisamente, la llaicidá, impartida por persones que tampoco pertenecen al mundu de la docencia”.

Pa la representante del Sindicatu d'Estudiantes, Anahí López, ye imprescindible una respuesta masiva a les distintes convocatories reivindicatives. Y ye que, el xueves, va arrincar con manifestaciones simultánees n'Uviéu (plaza D'España) y Xixón (plaza del Parchís), a les 12 hores, convocaes pola central, y, yá pela tarde, la unitaria n'Uviéu, que va partir, a les 18 hores de la Estación de Renfe, a la fin de Uría. Nesti casu, ye la Plataforma pola Educación Pública d'Asturies, qu'apigura a CCOO, UXT, SUATEA, Sindicatu d'Estudiantes y Fapa Miguel Virgós, la convocante.

La diputada Concha Masa recordó qu'IX defendió históricamente una educación pública y calidable que, dempués de la LOMCE, “ta n'entredichu”, tantu polos retayos como pol espíritu privatizador” d'esta llei, qu'apuesta por conciertos en desterciu de la escuela pública. La parllamentaria denunció tamién la tibieza de de partíos políticos que, primeramente, opunxérense a esti marcu normativu pero que, agora, paecen conformase.

La parllamentaria animó a estudiantes, profesores y a la población polo xeneral a sumase a les movilizaciones. “Animamos a suscribir la fuelga xeneral del día 9, el próximu xueves”.

El secretariu d'Ellaboración, Programa y Participación, Javier Suárez Llana, esplicó que ye imprescindible llantar cara a les contrarreformes llevaes alantre pol Gobiernu Rajoy, que van más allá de la Educación. Asina, aseguró que la política de tisories tuviera'l so reflexu en sanidá, xusticia, o nos intentos d'amenorgar derechos y llibertaes, al traviés de la reforma del Códigu Penal y la Llei de Seguridá Ciudadana. “En toos estos años el PP desenvolvió un procesu constituyente, y nós, dende IX, lo que pretendemos ye qu'esta llexislatura sía un procesu destituyente: destituyente de toles polítiques que'l Partíu Popular punxo en marcha”.