Al navegar por esta web acepta la utilización de cookies para análisis y personalización
Saber más    

Noticies Toles noticies d´IX

IX llogra que'l parlamentu asturianu refugue'l nuevu cupu vascu

La iniciativa cuntó colos votos de PSOE y Ciudadanos, l'astención de Podemos y el refugu de PP y Foru

El parlamentu asturianu aprobó esta mañana la iniciativa d'IX que refuga'l nuevu cupu vascu, axustáu por PP y PNV a cambéu del sofitu presupuestariu, yá que supon ampliar les diferencies en gastu per habitante afechu ente comunidaes autónomes, quebrando los principios constitucionales d'igualdá y progresividad del artículu 31 de la Constitución, amás de ser insostenible la so xeneralización al restu de les comunidaes autónomes pa la facienda pública. Esti puntu foi sofitáu por PSOE y Ciudadanos, amás d'IX, los votos en contra de PP y Foro y l'astención de Podemos.

Colos mesmos sofitos salió alantre otru puntu de la iniciativa, enmendada pol PSOE, na que la Xunta encamienta al Conseyu de Gobiernu a treslladar al Gobiernu Central esta posición contraria al nuevu cupu vascu según la esixencia de qu'esti sía oxetu d'un cálculu preciso y tresparente capaz de garantizar la suficiencia de recursos tanto a los réximes forales como al réxime común de financiamientu de les comunidaes autónomes.

La iniciativa cunta con un primer puntu, tamién aprobáu, esta vegada colos votos de PSOE, Ciudadanos y Podemos, el refugu del PP y l'astención de Foro, nel que s'espresa la compatibilidá del réxime de financiamientu común de les comunidaes autónomes y el modelu de conciertu y conveniu del País Vascu y Navarra, como espresión constitucionalmente establecida de la pluralidá y la solidez del modelu autonómicu de calter federalizante.

Llamazares, voceru parlamentariu d'IX, empezó la so intervención esclariando que nun cuestiona'l conciertu como modelu de financiamientu de País Vascu y Navarra, que ye perfectamente constitucional, sinón el nuevu cupu, que ye discriminatoriu y condiciona'l nuevu modelu de financiamientu. Sostuvo que los 1.400 millones d'escesu que'l Gobiernu vascu defende y l'amenorgamientu de más de 300 millones pal futuru nun ye xeneralizable. “Ye un modelu privilexáu, pero nonxeneralizable”, dixo concretamente Llamazares, quien tamién resaltó que condiciona'l financiamientu autonómicu qu'axusten les comunidaes autónomes.

El voceru sorrayó que la crítica tien que ver col modelu de cálculu que nun se correspondía nin con población nin con recaldación, que yá yera de sobrefinanciación. “Si l'índiz yera 100 por persona, Asturies representaba 110, los de Navarra 125 y más de 160 del cupu vascu, ensin entrar en calter tresparente o suficiente del conxuntu de financiamientu, y ensin entrar a falar d'un modelu solidariu que supondría qu'apurrieren tamién al interterritorial”, dixo.

La nueva sorpresa del nuevu modelu incide n'agravar el modelu anterior, siguió Llamazares. L'apautáu ye un escarniu directamente porque supon aumentar más la diferencia ente les comunidaes autónomes de modelu común y les del cupu. El financiamientu por persona afecha podría tar nel doble de financiamientu que'l restu del estáu ensin tener en cuenta'l calter tresparente y suficiente, ensin ser igualitariu y proporcionáu como diz artículu 131, y ensin tener fluxu de financiamientu solidariu.

Volver

Compartir

2014 Izquierda Xunida d'Asturies - Política de privacidad - Política de cookies