Menu

Alcaldes y alcaldeses y representantes de la formación nes cuenques encetaron esta mañana en Riosa polítiques comunes pa dar respuesta a les necesidaes de los sos territorios

El coordinador xeneral d'IX Asturies, Ramón Argüelles, denunció güei en Riosa l'incumplimientu de los compromisos del Gobiernu asturianu de Javier Fernández pa colos conceyos gobernaos por Izquierda Xunida. El máximu responsable de la formación amosó la so esmolición y anunció que van llevar la esixencia “hasta'l grau máximu”.

Argüelles axuntó esta mañana colos alcaldes de Riosa, Mieres y Morcín, Ana Díaz, Aníbal Vázquez y Maximino García, respectivamente, y con representantes de los equipos municipales d'IX en Llangréu y L.lena. L'oxetivu, coordinar acciones nestos territorios yá que, según señaló'l coordinador xeneral d'IX, “tenemos nos conceyos los mesmos problemes y vamos intentar faer comunes les polítiques pa solucionalos”.

Los incumplimientos n'inversiones de l'alministración rexonal –munches d'elles prometíes dende va décades- o los problemes en servicios d'atención a la ciudadanía marcaron un alcuentru que, a xuiciu de la rexidora de Riosa, Ana Díaz, ye “bien importante” una y bones, a pesar de les singularidaes de cada territoriu esisten, tamién, una serie de problemes y dificultaes comunes, pa lo que la coordinación d'acciones pue ser una meyor alternativa pa da-yos respuesta.

Nel alcuentru tamién participaron les secretaries de Política Municipal y Movimientos Sociales, Gabriela Álvarez y Mayka Barros, y el secretariu d'acción Política, Juan Ponte.