Menu

Ramón Argüelles y Vicente González Bernaldo de Quirós afiten tamién la medría del asturianu y l'aplicación del 6% del presupuestu a la producción de materiales como les sos prioridaes

Ramón Argüelles, coordinador xeneral d'IX d'Asturies, y Vicente González Bernaldo de Quirós esplicaron esta mañana les cuatro prioridaes básiques coles qu'IX va trabayar para'l desenvolvimientu de la Radio Televisión Asturiana (RTPA) como medio esencial de serviciu públicu. IX considera que ye necesario que'l Gobiernu empiece la ellaboración d'un contratu programa para la so aprobación na Xunta Xeneral, esixe que la RTPA cumpla la Llei Xeneral de la Comunicación Audiovisual qu'implica qu'el 6% del presupuestu xeneral añal sía dedicáu a la producción de materiales cinematográficos y televisivos; l'apueste pola diversidá llingüística fortaleciendo l'usu del asturianu, realizando informativos en llingua como propón l'Academia de la Llingua Asturiana; too ello pa cuntar con una televisión calidable.
 
La rueda de prensa produzse dempués d'una serie de xuntes con representantes del sector y sumar iniciatives pa una televisión pública calidable, plural y que lleve a cabu la cohesión territorial llingüística y social, amás de ser motor de la industria audiovisual asturiana, como aseguró'l coordinador xeneral.
 
Vicente González Bernaldo de Quirós amosó la esmolición d'IX pola presencia del asturianu na RTPA y reclamó una medría pa cumplir cola Llei d'Usu y tamién col desenvolvimientu de la diversidá llingüística, considerando que tien de faese d'una manera consensuada, ensin forzar. L'asturianu ye un elementu clave para desenvolver el serviciu públicu de televisión y la producción propia, esplicó González Bernaldo de Quirós, quien recordó que na última encuesta de l'Academia de la Llingua el 43% de los encuestaos manifiéstase a favor d'una mayor presencia del asturianu. “Esa va ser una reivindicación clave pa nós”, esplicó.
 
De la mesma, recordó qu'hai yá trés años que s'aprobó la II Llei de Reforma del Sector Públicu que plantegaba la puesta en  marcha d'un contratu programa qu'evaluara y desenvolviera tolos elementos por que la RTPA tenga calidá, continuidá y posibilidaes d'articular cultural y territorialmente Asturies. “Ye hora de qu'empecipiemos l'alderique para saber qué ye lo que más nos interesa pala defensa de la nuesa televisión pública y para ameyorar culturalmente la nuesa comunidá autónoma”, esplicó Bernaldo de Quirós. A xuiciu d'Argüelles el contratu ye fundamental pa evaluar el serviciu de la televisión pública.
 
Dambos repostiaron que la defensa de la televisión pública implica que nun haya nin un solu llugar onde nun se vea la televisión del Principáu, que ye un serviciu públicu. Ramón Argüelles apuntó la situación de munchos pueblos a onde nun llega la televisión asturiana y reclamó la igualdá d'accesu al serviciu públicu.