Menu

Ramón Argüelles apunta que la música de los númberos nun suena mal primeramente pero la lletra de la xestión cotidiana dexa abondo que deseyar

IX considera que cualquier pronunciamientu sobro'l Proyectu de Presupuestos riquiría un analís más reposáu frutu d'un estudiu de detalle sobro'l so conteníu. Polo tanto esta ye una valoración “d'urxencia” de calter necesariamente xeneral y pindiu d'esi analís más detalláu que, amás, va haber de faese colectiva y colexadamente. Nesti primer analís, IX considera que'l conteníu xeneral del presupuestu nun paez contener elementos insalvables y dexa marxe a la negociación, recoyendo demandes de la coalición. Entá asina, güei, esisten cuestiones estrapresupuestaries que puen enzancar l'alcuerdu, a xuiciu de Ramón Argüelles, Coordinador Xeneral d'IX d'Asturies. “La música de los númberos, siquier primeramente nun suena mal, la lletra de la xestión cotidiana dexa abondo que deseyar”, puntualiza Argüelles.

Ente les considerancies iniciales, según Ramón Argüelles, Coordinador Xeneral d'IX d'Asturies, la primera ye que tanto les cuantíes del presupuestu de gastos como la so orientación nun paecen contener elementos insalvables que faigan refugar un alcuerdu. Otra cosa son delles cuestiones que se producieron apocayá que, anque extrapresupuestaries, ensin dulda, inciden nel presupuestu y que pueden enzancar l'alcuerdu. “Toi refiriéndome a la esixencia del Principáu d'Asturies a los conceyos por que devuelvan les subvenciones destinaes a los planes locales d'empléu, asuntu qu'hai que solucionar cuanto antes”, alvierte. Tamién nos esmolez, según Argüelles, la xestión posterior del presupuestu, y ende, ye necesario alcordar mecanismos de siguimientu, daes les males esperiencies. La segunda ye que se nota que'l Gobiernu foi sensible a delles de les esixencies más categóriques que formulemos nel procesu negociador. Por concretar les más relevantes:

El gastu destináu a personal socio-económicamente más vulnerable creció de manera significativa: 15 millones más pal salariu social. 4´5 millones más pa la ERA, casi 1.000.000 más pa persones dependientes; 2.2 millones más p'ayuda a casa y teleasistencia, 5.000.000 más pa los conciertos municipales en materia de servicios sociales (y equí tán, ente otres, les ayudes destinaes a combatir la probeza enerxética y les ayudes d'emerxencia); 1.200.000 euros más destinaos a ayudes al arriendu y otres ayudes p'aportar a la vivienda, por citar les cantidaes más significatives. “En tou esto nótase clarísimamente la mano d'Izquierda Xunida y la mio esixencia personal d'una crecedera de non menos de 20.000.000 d'euros nesti proyectu respecto al anguaño vixente destináu a les persones más probes”, sostien Argüelles.

El presupuestu destináu a la etapa 0-3 crez en casi dos millones d'euros, casi un 20% respectu al vixente anguaño. Eso tamién se correspuende a una esixencia d'IX y dexaría, si la xestión d'esti dineru fora mínimamente eficaz, llograr los dos oxetivos que marcamos. D'un llau amenorgar la contribución directa de les families nel financiamientu del serviciu, amenorgando significativamente los precios a les families de clase media y baxa. D'otru llau amontar la ufierta pa cubrir tola demanda d'esti serviciu.

Ameyórase la ordenación del gastu sanitariu, reforzando'l financiamientu tanto de l'atención primaria como de salú mental, lo cual va contribuyir a ameyorar l'atención y a racionalizar el gastu, destinándolo allá onde ye más eficiente.

Amontar en 5.000.000 el presupuestu destináu a construcciones d'infraestructures educatives, especialmente de secundaria, lo que supon una medría de casi'l 400% y va dexar encarar la execución d'obres que lleven muncho tiempu pindios.

Crecen de manera bien significativa les cantidaes destinaes a financiar los programes de prevención de quemes forestales lo mesmo que de reposición de los daños causaos poles quemes, que crez en 1.300.000 euros. Pero ye que, amás, la partida destinada a la meyora de les infraestructures forestales crez en 3.000.000 d'euros, lo que dexaría, si hubiera xuna bona xestión, encetar con recursos los problemes del sector.

El programa destináu a Cooperación al Desenvolvimientu crez en 300.000 euros, lo cual supon una medría del 7%, respondiendo a la sensibilidá solidaria qu'esta fuerza político siempres caltuvo, anque inda tamos llueñe de recuperar el 0´7% de los recursos propios destinaos a cooperación al que nos obliga los alcuerdos de les Naciones Xuníes.

Ameyora'l financiamientu al programa de promoción de la nuesa llingua, con 70.000 destinaos específicamente a la promoción del asturianu na RTPA, una esixencia non yá d'esta fuerza político, que tamién, sinón de tolos espertos que comparecieron na comisión especial sobro la llingua asturiana na Xunta Xeneral del Principáu.

En materia medioambiental amóntase la partida pa la inspección ambiental, tanto en medios humanos como materiales. Y tamién en materia de protección del mediu ambiente destínense 500.000 euros pa la erradicación del plumeru de la pampa, xuna especie invasora que ta faciendo estragos, y que foi xuna reivindicación d'IX dende faer dellos años.

Sicasí, y como elementu negativu, el proyectu presupuestariu caltien les polítiques fiscales conteníes nel presupuestu vixente. Anque, verdaderamente, la revisión del modelu de financiamientu autonómicu podría obligar a revisar tanto la relación como'l modelu de xestión de los impuestos. “Al nuesu xuiciu la incorporación de nueves figures fiscales de naturaleza ambiental o de vezos saludables resulta bien conveniente”, diz Argüelles.

Sía que non queden asuntos abiertos que nun son tanto de naturaleza puramente presupuestaria pero que tán amestaos a la so xestión, que Ramón Argüelles menta de siguío:

Na etapa de 0-3, queda por estenar l'horizonte del so modelu de xestión al mediu plazu y el compromisu que pretendemos arrincar ye qu'estene la concreción del modelu lo antes posible (y por lo antes posible entendemos antes de rematar l'añu 2018).

Queda tamién pindio tantu'l compromisu del Gobiernu de presentar antes de rematar el primer cuatrimestre'l proyectu de llei de garantíes de derechos vitales básicos y el compromisu del grupu parlamentariu de desbloquiar la llei de procedimientos d'emerxencia ciudadana.

Queda pindia la ellaboración d'un estudiu de viabilidá xurídica y rentabilidad socio-ambiental d'esos impuestos pala so posible implantación nel presupuestu subsiguiente.

Y sobremanera, conclúi'l Coordinador Xeneral d'IX, queda pindio que'l Presidente comprometase a lliderar nel sentíu d'encabezar, de dirixir, l'acción de Gobiernu por qu’esos compromisos cumplanse pa qu’anque “la música de los númberos, siquier primeramente nun suena mal, la lletra de la xestión cotidiana dexa abondo que deseyar”.