Menu

El diputáu d'IX considera bien esmolecedora la descripción que realizó'l Ministru y pide inversiones inmediates

Pala coalición Fomento tamién certificó ayeri que l'Ave va rematar en La Pola L.lena

Ovidio Zapico, diputáu d'IX responsable de los asuntos d'Infraestructures na Xunta Xeneral, amosó esta mañana la so esmolición pol diagnósticu del ferrocarril, principalmente de les llínees de l'antigua Feve, qu'ayeri realizó'l Ministru de Fomentu, Iñigo de la Serna, anque coincidan coles denuncies de va años de la coalición. De les palabres del Ministru, el diputáu d'IX deduz que ta n'entredichu la seguridá de los pasaxeros, amás de la pervivencia del propiu ferrocarril públicu n'Asturies, una situación que tamién califica como bien grave y qu'esixe inversiones inmediates. De la Serna utilizó na presentación del plan de cercaníes palabres como terremplénes “críticos”, trenes avieyaos o víes colapsaes o túneles y pontes que nun ufierten les garantíes abondes.

Ovidio Zapico alvirtió que nos ferrocarriles tán desaniciando eses graves faltes en materia de seguridá amenorgando la velocidá de los convóis, p'asina garantizar, en cierta midida, que'l tránsitu pueda ser seguru o amenorgar bien de los riesgos del tránsitu, lo qu'implica retrasos y que'l tren sía menos curiosu pal usuariu. “La seguridá ye bien importante y lo qu'oyemos ayeri confírmanos la esmolición pol estáu de les víes”, dixo Zapico, quien ejemplificó col postreru foi un escarrilamientu asocedíu en La Pola Llaviana, motiváu pol mala traza de la trinchera, un exemplu de los munchos que pasen. “Si'l Ministru, que paez que reconoz la situación de les cercaníes, de verdá quier cumplir con Asturies les obres tienen qu'empezar nel menor plazu porque ta en riesgu non solo'l caltenimientu del nuesu ferrocarril públicu sinón la seguridá de los que nél viaxen”, alvirtió'l diputáu d'IX.

Amás d'esta alvertencia, Ovidio Zapico aseguró que, “por fin aquellos que contribuyeron al desmoronamientu de cercaníes nesta comunidá autónoma vinieron poner enriba de la mesa un carambelu na boca con cifres bastante importantes. El diagnósticu que realizó ayeri'l Ministru, Iñigo de la Serna, demuestra que tolo que mientres enforma tiempu lleva denunciando IX yera lo correcto porque tamos ante'l desmoronamiento de les cercaníes, certificó.

A xuiciu del diputáu d'IX el Ministru foi “inclusive benévolu” despintando gráficos importantes del descensu acusáu de pasaxeros nes llínees nos últimos años. Pa IX la presentación del Ministru na delegación del Gobiernu tamién dexó ver, ente llínees, l'anunciu de que l'alta velocidá n'Asturies termina en La Pola L.lena, anunciando 88 millones d'inversión pal tramu de La Pola L.lena-Xixón y l'usu d'una especie de danzaderes pa esi percorríu. Magar estes inversiones “in extremis”, Zapico considera que les inversiones pa les llínees de l'antigua Feve son preocupantemente menores.

Ovidio Zapico echó de menos conocer el modelu futuru qu'empón estes inversiones, colos sos oxetivos, si va haber frecuencies ambicioses o se va a quedar nesa media hora o quince minutos d'adelantu de les frecuencies, nel meyor de los casos, qu'ayeri s'anunció.

“El Ministru tampoco dio lluces nun aspeutu bien importante y esmolecedor porque munches vegaes significa cancelaciones, que ye la incorporación de maquinistes. Colos datos que remanamos el númberu de maquinistes que van destinar a Asturies ye insuficiente”, sollertó.

En resume, pal responsable d'Infraestructures nel grupu parlamentariu d'IX, puede tratase d'un bon plan sobro'l papel pero ye escépticu na so execución. “Como amuesa de porqué somos escépticos ye la execución del presupuestu de 2017. En Adif, a 30 de xunu llévase executáu n'Asturies el 13,1% o en Renfe el 20,4%”, ejemplificó.

IX va presentar una interpelación al Conseyu de Gobiernu pa saber la so valoración d'esti plan y pa saber feches ciertes d'entamos concretos d'inversiones y de cómo va ser esi siguimientu semestral qu'ayeri anunció de la Serna, si va tener parte'l Gobiernu rexonal y cómo van conocer los grupos parlamentarios cómo se desenvuelven eses inversiones na nuesa comunidá.