Menu

El diputáu Ovidio Zapico considera que tien de desenvolvese sobro la voluntariedá, la flexibilidá nel númberu de conceyos y el lideralgu dende l'ámbitu municipal col acompañamientu del Principáu

IX reclama al conseyeru d'Infraestructures que desbloquie la área metropolitana d'Asturies como preséu fundamental pa consiguir una mayor eficacia y ameyorar los servicios que s'empresten a los ciudadanos. Ovidio Zapico, diputáu d'IX responsable de los asuntos de la mentada conseyería, y Aurelio Martín, voceru d'IX nel Conceyu de Xixón reclamen al executivu socialista que retomen el desenvolvimientu de l’área central fracasada nos dos últimos años pola “unilateralidá” de l'anterior conseyera. Zapico considera qu'esta área central tien de desenvolvese sobro trés conceutos fundamentales: la voluntariedá, la flexibilidá nel númberu de conceyos, y el lideralgu dende l'ámbitu municipal col acompañamientu del Principáu. El diputáu tamién apuntó de la necesidá de cuntar col conceyu de Xixón, el de mayor población d'Asturies.

Ovidio Zapico esplicó qu'IX nun da por perdida esta llexislatura pa establecer esti importante proyectu nun parlamentu que ye'l más plural de la hestoria y que, sicasí, nun puede ser el de la negociación y el bloquéu, sinón el de la política. IX, dixo, “va poner tolo que tea na so mano pa llograr un gran alcuerdu nos próximos 15 años pa ver lluz nun proyectu xenerador de riqueza y sinerxes por que l’área central bombé sangre y fuerza a les nales d'Asturies. Esti mesmu xueves una delegación d'IX va aconceyar col Conseyeru d'Infraestructures, Ordenación del Territoriu y Mediu Ambiente, Fernando Lastra. Tamién indicó que ye'l momentu d'empecipiar la tramitación de les Directrices Rexonales y les Subdirectrices rexonales.

Aurelio Martín, voceru d'IX nel Conceyu de Xixón, adelantró na rueda de prensa d'esta mañana que la coalición va proponer a Lastra la creación d'un preséu d'alderique onde los conceyos puedan apurrir les sos suxerencies pa desbloquiar una cuestión que figuraba yá nel programa electoral d'IX y nel pactu de investidura de Javier Fernández en 2015. El conceyal de Xixón tamién avanzó que'l documentu ellaboráu nel Conseyu Social de Xixón, por consensu, puede sirvir de base pa llograr qu'esi alcuerdu social y políticu de la mayor ciudá d'Asturies tenga una referencia a nivel autonómicu. “Nun s'entendería por qué n'Asturies les fuerces polítiques, sociales y económiques pueden llegar a alcuerdos con oxetivos y criterios y n'Asturies non”, esplicó Martín.