Menu

La eurodiputada d'IX rexistra una entruga parlamentaria na qu'alvierte de que'l regulador español nun ellaboró'l plan d'igualdá al que ta obligáu por llei dende hai 10 años.

La eurodiputada d'Izquierda Xunida Ángela Vallina denunció énte la Comisión Europea que'l Bancu d'España ta incumpliendo la lexislación en materia d'igualdá, al nun ellaborar nin poner en marcha un plan d'igualdá al que ta obligáu dende la entrada a valir de la Llei Orgánica 3/2007, de 22 de marzu, pa la igualdá efectiva de muyeres y homes. Esti fechu, reveláu pol Tribunal de Cuentes nun informe de principios d'añu sobro paridá nel sector públicu estatal, podría suponer tamién, según la parllamentaria, la vulneración de la Directiva 2006/54/CE.

Nuna entruga parlamentaria, Vallina esplica que dicha Llei Orgánica obliga nel so artículu 45 "a la ellaboración y aplicación de planes d'igualdá nes empreses y organismos de más de 250 trabayadores" y que tal que queda afiguráu nel informe del Tribunal de Cuentes 2012 - 2014, el Bancu d'España nun lo ta aplicando.

Esto, dende'l so puntu de vista, podría frayar la Directiva 2006/54/CE, "n'especial el párrafu 3 del artículu 21, que fai mención a la promoción de lleis, negociaciones colectives y práctiques pa promover un tratamientu igual ente muyeres y homes nel llugar de trabayu".

Amás de la Llei Orgánica, el regulador financieru español ta incumpliendo la disposición adicional séptima del Real Decretu Lexislativu 5/2015, pol que s'aprueba'l testu refundíu de la Llei del Estatutu Básicu del Emplegáu Públicu.

Vallina entruga nel so escritu a la Comisión Europea qué midíes piensa adoptar Bruxeles énte esti incumplimientu y si ta al tantu de que l'Estáu español tea incurriendo n'otros incumplimientos similares. No que se refier al sector públicu, l'informe del organismu fiscalizador señalaba que siquier otros cinco organismos públicos nun tán aplicando estes midíes pa favorecer la igualdá ente homes y muyeres.

"Ye escandaloso que'l Bancu d'España nun tuviera aplicando un plan d'igualdá, cuando la llei oblígalu a ello. Nun esisten esceiciones énte la llei, y menos n'instituciones públiques. Esperamos a saber lo que nos diz la Comisión Europea, pero rescampla qu'esiste un riesgu de que l'Estáu español sía alvertíu pola Unión Europea por incumplimientu de la Directiva d'igualdá d'oportunidaes ya igualdá de tratu ente homes y muyeres n'asuntos d'emplegu y ocupación", señaló.

Lo que "sí tenemos claro", añedió, "ye que'l Gobiernu de Rajoy nun ta comprometíu cola igualdá de xéneru, tal que dexó claro hai unes selmanes cuando-y preguntaron sobro la fienda salarial y contestó qu'esa tema meyor nun tocala, o como lo demuestren tanto l'ausencia d'un plan real d'igualdá, como los continuos retayos en polítiques de xéneru".