Al navegar por esta web acepta la utilización de cookies para análisis y personalización
Saber más    

Noticies Toles noticies d´IX

04/05/2018

Llamazares acusa a Javier Fernández d'arrenunciar a la dirección política respectu al Grau del Deporte mientres ye'l Rector el que fai política

El voceru d'IX recuerda que l'autonomía universitaria nun pue ser escusa pal Gobiernu porque'l desenvolvimientu educativu ye la so competencia

Gaspar Llamazares, voceru parlamentariu d'IX d'Asturies, acusó al Presidente del Principáu d'arrenunciar a la dirección política y dexar la política en manos del Rector de la Universidá respecto al Grau de Deporte y l'área metropolitana d'Asturies escudándose na autonomía universitaria, que al so xuiciu nun ye absoluta nin trai'l derechu d'autodeterminación y el derechu a decidir que güei reclama'l rector.

L'autonomía universitaria dase nel marcu de la Llei Xeneral d'Universidaes y teniendo en cuenta l'autonomía política de les comunidaes autónomes, alvirtió Llamazares na so vez d'entrugues al Presidente na Xunta Xeneral. Aludió'l voceru d'IX al Tribunal Constitucional na so argumentación y recordó que ye nel Conseyu Social onde se concilien les dos autonomíes, la universitaria y la política. El Conseyu informó favorablemente del Grau de Deporte y saben qu'agora tienen que faelo ustedes, el Gobiernu. “Ustedes llaven les manos y el Rector fai política, estremando'l grau ente dos ciudaes y ye el rector el qu'enfrenta los conceyos, faciendo política y ustedes dexen el vacíu na política”, repitió. N'Asturies la falta de política sustitúyese pola dirección del Rector, aseguró énte la negativa del Presidente a tomar la decisión sobro l'allugamientu. Pa Llamazares el Rector decide sobro l'ámbitu académicu, sobro la llibertá de cátedra…pero nun tien competencia esclusiva nos diplomes y nos centros, porque tien que concilialo cola comunidá autónoma, sostuvo'l voceru d'IX. Ye más, “usté tien la competencia en desenvolvimientu educativu”, sostuvo. Frente a esto, Javier Fernández, dixo Llamazares opta por faer política llavándose les manos porque piensa que si se define'l so partíu va tener menos opción nun llugar que n'otru.

A xuiciu de Llamazares, l'autonomía de la Universidá ye compartida y apeló a la responsabilidá de Javier Fernández como Presidente de la comunidá autónoma. Como exemplu, d'esta autonomía compartida foi la decisión de poner esi campus en Mieres y dotalo con instalaciones importantes deportives de 6,6 millones d'euros pa instalaciones deportives con una “clara voluntá política”. Nesi sentíu, aseguró que ye xuegu xugáu. Llamazares recordó que siendo diputáu nel Congresu propunxo'l financiamientu d'un centru d'altes prestaciones en materia deportivo nos presupuestos xenerales, centru que foi bloquiáu per parte de la comunidá autónoma, porque nun taba nel so esquema.

Por una vegada tienen de comprometese col campus de Mieres y dinamizarlo. “Nun hai infraestructura nin equipamientu como'l de Mieres pal Grau del Deporte, aseguró. Otru planteamientu supondría nueves inversiones, asuelu, espilfarru…-

A lo último, Llamazares resumió les diverses razones p'allugar el Grau de Deportes nel campus de Mieres: l'autonomía ye compartida, tien responsabilidá en que campus tea dotáu y sía rentabilizáu y por razones d'oportunidá política. “Cuando'l Rectoráu fai política'l Gobiernu nun puede llavase les manos, tien que faer política y eso significa dirixir la comunidá autónoma. Si esto nun tien que ver con ordenación del territoriu, acabemos. Tien que ver cola ordenación del territoriu y el desenvolvimientu lexislativu en materia d'educación, y cola área central d'Asturies. Tamién con dirixir políticamente la área central, concluyó.

Pela so parte, Javier Fernández aseguró que l'entiende por autonomía universitaria la “non inxerencia na capacidá de autoorganización” de la institución y que, sía que non, van respetar la decisión que la Universidá d'Uviéu faiga llegar al Conseyu de Gobiernu sobro esti grau del Deporte. El Constitucional nun fala en nengún casu de les titulaciones, dixo Fernández al respective de les competencies de la comunidá.

“Yo soi partidariu de qu'haya más titulaciones nel Campus de Mieres pero nun voi dicir al rector cuálos”, aseveró mientres la so intervención. Tamién acusó a IX de remanar esti asuntu dende puntu vista d'interés políticu y xenerar tensión ente los conceyos.

Volver

Compartir

2014 Izquierda Xunida d'Asturies - Política de privacidad - Política de cookies