Al navegar por esta web acepta la utilización de cookies para análisis y personalización
Saber más    

Noticies Toles noticies d´IX

07/06/2018

Masa encamienta a Educación a establecer un modelu públicu, educativu, gratuitu y tendente a la universalización pal ciclu cero a trés

Reprocha al Conseyeru que “esmuza'l bultu” y esixe axilidá pa un modelu consensuáu

Concha Masa, diputada d'IX, reclamó al Conseyeru d'Educación un modelu pal ciclu de cero a trés años que pa la coalición tien de tener delles condiciones imprescindibles: el calter públicu, el calter educativu, la medría de la ufierta con enclín a la universalización y un calendariu de posible gratuidá. La diputada llamentó mientres la so intervención na Xunta Xeneral les incógnites qu'entá caltien el Gobiernu autonómicu, cuando constaba nos alcuerdos de investidura, y dempués d'un estudiu que tenía que tar presentáu va un añu y agora, según el Conseyeru, ta peracabando. “Usté mientres esti tiempu foi esmuciendo'l bultu y retrasando la cuestión”, espetó Masa.

Masa encamentó al Conseyeru d'Educación a ponese a trabayar darréu y con axilidá para consiguir un modelu consensuáu, bonu, públicu y con pautes clares, por culpa de que el esistente ta “prácticamente escosu”. Nesti sentíu, la diputada d'IX sorrayó que los conceyos lleven tiempu llamentándose de la responsabilidá que-yos supon, el trabayadores tán disconformes cola situación poles distintes condiciones llaborales y económiques, y esiste una importante demanda que va quedar ensin cubrir. Masa celebró que, cola demanda y el sofitu d'IX, esti próximu cursu les tarifes van amenorgar a la metá, cuestión qu'incide directamente nun aumentu de demanda, pero tamién preguntó “qué midíes al curtiu plazu tienen previstes pa satisfaer esa demanda?”. Ente les interrogantes del grupu parlamentariu d'IX tamién figura saber si estableció contactos con trabayadores, coles organizaciones sindicales y coles families usuaries, y con qué calendariu, amás de saber si col nuevu Gobiernu estatal va reclamar la implantación a nivel nacional d'un plan similar al anterior socialista, l'Educa 3, esaniciáu pol PP, que supondría xuna importante ayuda p'Asturies.

El Conseyeru d'Educación, Genaro Alonso, reconoció que'l modelu actual ta escosu, anque vixente y que “nesti semestre” va completar la propuesta de xestión. Nesi estudiu, a “puntu de rematar”, Educación decantase pola xestión indiferenciada per parte de la Conseyería o por un organismu autónomu, esti postreru con mayores posibilidaes. Nes próximes selmanes, indicó, va abrir conversaciones pa ver el cronograma pa establecer un modelu pa la “próxima llexislatura”. Recordó qu'hai “aspeutos complexos” como la situación de los trabayadores, y qu'una vegada afitáu'l modelu va haber que faer un periodu de repliegue de los conceyos y da-y forma, establecer un calendariu, realizar llei o lleis que la regulen y establecer les consecuencies pal erariu públicu. Nesti sentíu, Educación invierte anguaño 13 millones d'euros nel ciclu cero a trés y la gratuidá col númberu d'escueles conveniadas actuales supondría 21 millones d'euros.

Alonso comprometióse, per otru llau, en tratar esti asuntu, na primer ocasión que tenga, col nuevu equipu del Ministeriu d'Educación.

Volver

Compartir

2014 Izquierda Xunida d'Asturies - Política de privacidad - Política de cookies