Menu

Concha Masa y Gabriela Álvarez consideren qu'esaniciar estos estudios nel conceyu condergaría a dellos estudiante a “quedase en casa" por falta d'oportunidaes

Raul Gayo pide a educación qu'en socesives matrícules tenga en cuenta non solo los alumnos del Conseyu, sinón tamién los de Degaña, Ibias y Tinéu.

La diputada d'IX Concha Masa amosóse güei satisfecha pol compromisu del caltenimientu de la ufierta de Formación Profesional Básica (FPB), realizada pol Conseyeru d'Educación, tres la presión exercida por IX nes últimes selmanes. Ello ye que el Principáu prevía la supresión d'estes enseñances, al nun algamar un alumnáu mínimo.

“Dende IX defendimos que se mantuviese esa ufierta porque pensamos que ye una opción indispensable pa un conceyu como Cangas y tamién pa la contorna, porque supon una opción única pa ciertos estudiantes que nun podíen terminar la Educación Secundaria Obligatoria y que, d'otra manera, quedaríen ensin nenguna posibilidá educativa real”, enfatizó la parllamentaria.

IX llevara a la Comisión d'Educación y Cultura esta situación d'incertidume que, agora, paez que s'estena: “El conseyeru manifestó públicamente na Comisión la so voluntá de rectificar y ufiertar efectivamente los programes de formación profesional básica tamién para esti cursu”.

Pa la secretaria de Política Municipal d'IX, Gabriela Álvarez, el caltenimientu d'esta formación yera imprescindible. “Tamos bien satisfechos de les xestiones y presión qu'exercimos, tantu dende'l grupu municipal de Cangas de Narcea como de la nuesa diputada Concha Masa pa caltener el módulu de formación profesional”. Y ye que, recordó Álvarez, en conceyos con dificultaes xeográfiques y de población tienen que tener un tratu preferente y caltener estes unidaes como una alternativa a los mozos. “D'otra forma quiciabes tendríen que quedase en casa. Creo que ye xusto y razonable que, dende l'Alministración rexonal facilítense esti tipu d'alternatives”.

Dende Cangas, el conceyal d'IX Raul Gayo reprochó al Partíu Popular local les sos crítiques de la que recordó qu'a pesar del anunciu del zarru de la FPB, la formación caltuvo la presión pa evitalo: “Decidimos apostar por más presión y presentar una entruga oral énte la Xunta Xeneral del Principáu, sumáu a los movimientos del AMPA, del Claustru de Profesores y d'otros grupos políticos de la Xunta consíguese que'l Conseyeru vuelva abrir matrícula de FPB. Como yo queremos dicir qu'IX nun foi un espectador inactivu ante la problemática; foi parte activa, una más pa resolver el problema, llueñe de la pretensión del PP local de inacción”.

Pa socesives matrícules, Raul Gayo recordó que'l conseyeru, antes d'adoptar cualquier decisión sobro la FPB en Cangas tien de tener en cuenta qu'esta ufierta formativa ye pal conceyu, pero tamién pa otros conceyos de la zona. “Pa la matrícula non solo hai cuntase colos alumnos del IES de Cangas de Narcea: hai de valorar quién, dende Degaña, Ibias y Tinéu taríen dispuestos a matriculase na nuesa modalidá de FPB como asocedió n'años anteriores onde sí había alumnos d'esos conceyos”.