El secretariu d'organización señala que l'afiliación faló con claridá y considera que l'alta participación ye un componente emocional que demuestra que la militancia quería espresar "lo que lleva dientro"
El secretariu d'organización d’IX Asturies, Alejandro Suárez, aseguró güei que les resultancies del referéndum celebráu ayeri va marcar la orientación estratéxica” de la formación de cara a les próximes elecciones autonómiques, nuna consulta que cuntó la mayor participación de les postreres realizaes y que los sos resultaos son venceyantes. “Recoyemos esa orientación y vamos empezar a trabayar”, enfatizó Suárez quien, a la vista de les resultancies, amosóse confiáu en que los discutinios previos a la votación quedaren definitivamente superaos. “Les tensiones de les direcciones o les discrepancies d'opinión resuélvense votando”.
Con más del 86% de los votos a favor de qu'IX allegue en solitariu a los próximos comicios, una cifra récord de participación, la militancia d'IX espresó n'urnes un deséu mayoritariu de dexar aparcaes coaliciones electorales nel ámbitu autonómicu. Más mil persones -el 53% del censu- depositaron los sos votos nes urnes y agora tase a la espera del escrutiniu del votu per corréu que, sicasí, nun va ser significativu nes resultancies una y bones la cifra total ye inferior a les 40 papeletes.
Al pie de Suárez, compareció tamién Mariano del Prado, secretariu d'organización d'Uviéu y responsable del recuentu, quien destacó l'alta participación yá que, recordó, tratase de la más alta de les rexistraes nes distintes consultes realizaes por IX Asturies. “El datu de participación más altu que teníamos hasta agora foi nes primaries pasaes pa escoyer el candidatu y foi del 47% per cientu. Si agora tenemos un 53% pensái que la participación ye bien alta, nunca tuviéramos una participación tan importante”.
La movilización respuende, a xuiciu d'Alejandro Suárez, en visu a la consulta, al tratase, dixo, “de daqué que la xente vive bien emocionalmente. Nun hai dirección política que pueda dirixir, que pueda determinar una salida a votación como la d'ayeri; nun la hai, nin nun sentíu nin n'otru. Eso ye que la xente quier espresar daqué que lleva dientro”.
Los datos de participación de la consulta, 22 puntos percima de l'anterior sobre confluencia, son, amás, especialmente pervalibles por culpa de que les garantíes nos procedimientos fueron totales: “Hai que venir, personase, votar, tar afiliaos. Poro, la voluntá d'esta organización quedó ayeri bien espresada y supera lo que la dirección puede o nun puede siquier dirixir o impulsar. Otra cosa ye que sabíamos interpretar por onde quería dir la nuesa organización. Eso sí ye verdá”.
Alejandro Suárez, a entrugues de los periodistes, restó importancia a los discutinios previos a la consulta y amosóse convencíu de que, tres el referéndum, van quedar superaes. “Yo espero que sía asina porque, amás, el secretariu d'organización, nesti casu yo mesmu, nun dexa de ser parte, una parte pequena, de too un sector políticu. Esto ye, yo nun toi equí representándome a mi, sinón a una parte de la organización que quería que les coses fueren nuna dirección determinada y lo que tenemos qu'alcordar, ente tola pluralidá interna d'IX, como fiximos con esti referéndum, y superalo. Agora tenemos que centranos nes elecciones. Creo que'l sentíu común tien que tar percima de too.
Valoración #ReferéndumIUAsturias
Publicada por IU Asturias en Viernes, 29 de junio de 2018
Diputáu Autonómicu y Coordinador d'IX
Diputado Autonómico
(Mas Asturies)
Diputada Autonómica
Convocatoria por Asturies