Menu

Ovidio Zapico considera que tienen de realizase siquier cada 48 hores y faer públiques les resultancies

IX esixi al Gobiernu de Javier Fernández qu'intensifique la toma d'amueses nes sableres primera y segunda de L.luarca, con una periodicidad de non más de 48 hores y que les resultancies de los analises faiganse darréu públicos. “Ye la meyor ferramienta pa treslladar la supuesta tranquilidá que dicen hai nel bañu y que la ciudadanía y el sector hosteleru esixen güei”, esplica'l diputáu d'IX que se treslladó a la capital de Valdés en conociéndose un informe d'Ecoloxistes n'Acción qu'otorga una “bandera negra” por contaminación a los arenales primeru y segundu de la capital valdesana. A xuiciu del diputáu d'IX, nun hai meyor reacción que la información y la tresparencia. Ye más, si por dalgún motivu esos datos nun fueren tan optimistes o correctos habría qu'analizar d'ónde proceden, dir al so orixe y buscar una solución.

El grupu parlamentariu d'IX da credibilidá al informe d'Ecoloxistes n'Acción sobro la situación denles sableres de L.luarca y xulga que Principáu interpretó mal el mesmu yá que nada tien que ver la bandera negra de L.luarca cola de la depuradora de Maqua, que nun rellacionen nel citáu estudiu.

Pal diputáu d'IX, nun ye una cuestión de poner un sambenitu a estes sableres, sinón de poner atención nun problema que nun ye nuevu y repitióse en más ocasiones. “Ta perbién esplicáu nel preámbulu del estudiu de les banderes negres, que ye que la organización incide cada añu nun problema distintu, anque tamién señala que na de Xixón son los mesmos problemes qu'otros años. Énte esto hai solución y ye bono qu'haya daqué qu’espolée a l'alministración pública y aprovéchese pa echar la recuarta a los problemes”, argumentó Zapico.

Del informe d'Ecoloxistes n'Acción esprendese que se trata d'un problema d'agües fecales y too apunta que pueda tener que ver col saneamientu de la villa, dixo'l diputáu d'IX énte les entrugues de los periodistes. Si faen analís cada 48 hores va poder determinase l'orixe.

El diputáu rexistró esta mañana delles entrugues pa la so respuesta por escritu per parte del Gobiernu autonómicu. Son les siguientes: ¿Realizó l'Alministración del Principáu dalgún analís recién sobro la calidá de l'agua nes sableres 1ª y 2ª de L.luarca?; ¿De ser asina, con qué resultaos?; ¿Cuál ye la razón pola que nun se fixeron públicos el pasáu añu los analises que reflexaben valores desaxeradamente altos de la bacteria Escherichia coli, indicadora de contaminación fecal?; ¿Qué midíes tomó o piensa tomar en collaboración col Conceyu de Valdés pa revertir la situación de mala calidá de les agües d'estes sableres y prevenir episodios de contaminación?

Isabel Guardáu, coordinadora d'IX de Valdés, considera necesariu realizar analises periódicos pa tranquilidá de los vecinos y nun tar inseguros nunes de les sableres de mayor confluencia y accesible nel conceyu. “L'allugamientu de paneles colos analises ta bien, anque tendríen de faese como diz Ovidio Zapico, cada 48 hores”, repitió Guardáu.

Sobro'l discutiniu de los perros en sablera de Sabugo, Guardáu recordó que pertenez a la reserva natural parcial de la Sablera de Barayo. “Ye obviu qu'hai otres sableres onde pueden llevase a los animales, con meyores accesos y onde nun esista esa peculiaridá”, esplicó la coordinadora d'IX de Valdés. IX, que sofita toles meyores pa los animales, considera que sería meyor la sablera de Portizuelo que tien un bon accesu y nun ye xuna sablera bien allegada.