El secretariu d'Organización Federal, Ismael González, reclama al Ministeriu del Interior recursos pa reforzar la seguridá y una evaluación de riesgos.
Ramón Argüelles, Ana Díaz y Begoña Collada treslladen a la Delegada del Gobiernu la so esmolición y la necesidá d'esclariar l'asesinatu de Llanes y los anónimos de Riosa cuanto antes
IX salió güei de nuevu a la cai pa esixir el fin de la campaña d'acoso contra los sos cargos públicos y la “sangría de filtraciones” sobre'l casu del edil asesináu Javier Ardines.
Nuna concentración frente a la delegación del Gobiernu, n'Uviéu, l'Alcaldesa de Riosa, Ana Díaz, y la secretaria d'Organización de Llanes, reclamaron la máxima implicación de toles instituciones pa resolver un crime que, como remortines, dexó un rosariu de comentarios malintencionaos, un anónimu con amenaza de muerte a la rexidora riosana y el rayáu polos sos cuatro costaos al vehículu del conceyal d'esi mesmu conceyu José Manuel Pello, sobre'l que dexaron una macabra firma: el acrónimo de fuelgue en paz (DEP). A esti dolor, recordaron dambes y tamién el restu de cargos d’IX Asturies y Federal, sumense agora filtraciones interesaes que tienen de ser investigaes pa pone-yos puntu final, por culpa de que en nada ayuden a les investigaciones en marcha.
Ana Díaz recordaba a Gandhi pa pidir cordura a tolos partíos y tola sociedá. “Güeyu per güeyu, el mundu va quedase ciegu. Por eso, enxamás vamos responder de la mesma, pero respondemos, equí tamos, poniendo nome y cara al sentimientu de repulsa más absolutu a tan enxitosos actos. Equí tamos, nun nos escondemos”.
Pela so parte, Begoña quixo estimar el sofitu de cuantes persones tán dando un pasu al frente pa dicir basta. “Gracies por acompañanos n'unos momentos nos que ye más necesario que nunca la unidá pa defender los derechos y les llibertaes, la democracia”.
La movilización foi siguida y secundada pola dirección en plenu d’IX Asturies, col so coordinador xeneral, Ramón Argüelles a la cabeza, el grupu parlamentariu en Plenu, Y alcaldes, conceyales y militantes y simpatizantes de la formación en distintos conceyos. Amás, dende Madrid viaxaron el Responsable d'Organización y Finances, Ismael González López; la Responsable d'estensión organizativa y de redes y árees, Lola Sánchez Tudela; y l'Adxunta d'Acción Institucional, Noa Román Cueva.
Ismael González esplicó qu'esta mesma selmana axuntóse con representantes del Ministeriu del Interior pa esixir “que pongan recursos y que s'esmolezan pola situación de los cargos públicos, concretamente de los d'Izquierda Xunida n'Asturies poles situaciones qu'hubo, tanto pol asesinatu del compañeru Javier Ardines, como los postreros incidentes en Riosa”.
La xunta col ministeriu, señaló'l Secretariu d'Organización Federal, concluyó amás col compromisu de buscar víes pa ver en qué puede reforzase la seguridá de los cargos públicos.
Esti alcuentru, precisó González, desenvolvióse al más altu nivel, magar esclarió que non directamente col Ministru Marlaska. “Lóxicamente tienen qu'habilitar un dispositivu especial de seguridá, tien que faer una evaluación de riesgos. Ye obvio que yá hai riesgu y polo tanto eso tien que ser rápido. Ye lo qu'esiximos”, enfatizó.
Magar el responsable d'Organización d'IX Federal reconoció que l'asesinatu de Ardines y los anónimos y desperfectos en Riosa son casos y conceyos bien distintos, aprofió que'l crime de Llanes utilizárase p'amontar les amenaces a los cargos d'IX riosanos. “Paez qu'hai una conexón; nós nun podemos dicir un res, hai una investigación xudicial que ye quien lo tien que dicir”, recordó'l dirixente federal quien aprofió qu'esta deriva ye necesario parala pa evitar que se reproduzan n'otros conceyos y n'otros cargos públicos “sían d'Izquierda Xunida o de la organización que sían”:
Al respective de les filtraciones, Ismael González reprochó les filtraciones que, al so xuiciu, sobren nuna investigación sobro la que pesa un decretu de sumariu. “Nós lo que queremos ye que s'esclarie'l procedimientu xudicial, les filtraciones y l'asesinatu de Javier Ardines. Fuimos bien respetuosos col procedimientu xudicial, tanto IX d'Asturies, como a nivel estatal y vamos siguir siendo: lo que pidimos ye esi respetu y que si hai filtraciones tamién queremos que s'investiguen y que se sepa por qué tán asocediendo estes filtraciones. Nun tien nengún sentíu nin ayuden en nada a la investigación”.
El coordinador xeneral d’IX Asturies, Ramón Argüelles, treslladó, tres la concentración, el malestar de la formación poles filtraciones, nuna xunta que caltuvieron cola delegada del Gobiernu, Delia Llosa, que lu convidó, al pie de Ana Díaz y Begoña Coláu al so despachu pa encetar la difícil situación pola que tán pasáu los cargos orgánicos ya institucionales de la formación especialmente en Llanes y Riosa.
Argüelles esplicó que'l próximu llunes va axuntase la Xunta de Seguridá d'Asturies, a pidimientu d'IX, pa encetar posibles midíes que puedan dexar baxar la tensión y contribuyir nes investigaciones abiertes. Les amenaces, enfatizó el máximu responsable d'IX, nun pueden vese de forma aisllada sinón que tienen implicaciones pa toles fuerces. “Esti problema agora ye'l nuesu pero pueden tenelu otres organizaciones. Oxalá nun sía asina, pero creo que'l problema perteneznos a tolos partíos políticos”.
Una vegada rematada la concentración, yá de forma privada, los representantes de la Dirección Federal d'IX, al pie de miembros de la Dirección d’IX Asturies caltuvieron un alcuentru con representantes de la organización en Llanes y Riosa pa encetar la difícil situación pola que traviesen en dambos conceyos.
Contra todo tipo de violencia. No tenemos miedo, sí dignidad e ideología.
Publicado por Ramón Argüelles en Jueves, 27 de septiembre de 2018
Diputáu Autonómicu y Coordinador d'IX
Diputado Autonómico
(Mas Asturies)
Diputada Autonómica
Convocatoria por Asturies