Menu

Masa reclama, una vegada más, un asuntu posible y necesario p’acabar cola precariedá del profesoráu

El Conseyeru d'Educación, Genaro Alonso, espera, una vegada más, una entrevista cola Ministra d'Educación, Isabel Celaá, pa resolver la creación de la especialidá docente de llingua asturiana. Asina respondía a la ventiava entruga de la diputada d'IX, Concha Masa, sobro cuándo se va solucionar esti asuntu que tien a más de 350 profesores de la materia na precariedá. A xuiciu de la diputada ye una reconocencia posible, necesario y responsabilidá del Conseyeru. Ye posible porque asina lo dicen informes técnicos y xurídicos por aciu el cambéu de los reales decretos de primaria y secundaria, inclusive de la LOMCE como reconocencia a les llingües que nun siendo oficiales tienen reconocencia xurídica.

Masa encetó tamién l'acuciosa necesidá pal profesoráu, 350 na educación pública y dalgunos más na privada, que s'atopen con una mayor precariedá frutu de tar nuna bolsa d'interinos ensin poder optar a una plaza fixa porque nun se convoquen oposiciones. La diputada d'IX tamién alvirtió na so intervención que'l Gobiernu estatal “tomónos el pelo” apostrando la xestión.

Concha Masa reclamó al Conseyeru qu'encamiente a la Ministra a llevar a cabu la reconocencia de la especialidá de forma urxente y plantega-y un calendariu. “Nun tenga mieu, porque nun hai por qué venceyar la reconocencia cola oficialidá porque ye una cuestión de xusticia”, dixo Masa.

Pela so parte, Alonso dixo que ye “posible y vidable” la reconocencia de la especialidá y “fácilmente facedera” anque tamién reconoció'l so “nulu ésitu” col Gobiernu anterior que cuntó “cola complicidá del PP d'Asturies”.