Menu

El coordinador xeneral aboga por una baxada de la tensión qu'evite un choque de locomotores y que favoreza l'entendimientu

El coordinador xeneral d'IX Asturies, Ramón Argüelles, anunció güei la convocatoria de los órganos pa falar de la situación creada tres l'apertura d'un espediente contra Gaspar Llamazares per parte de la organización Federal. L'oxetivu, señaló, ye que s'esplique a la militancia y a los mesmos órganos, el nuesu voceru, el señor Gaspar Llamazares, y para dar treslláu tamién d'esti espediente de Madrid y ver en qué términos s'enceta”. P'Argüelles, la situación nun beneficia a naide, polo qu'abogó por una baxada na tensión empobinada a llograr un entendimientu qu'evite daños a toles partes.

Al respective de la previsión de xuntes de dirección, prevese que la Comisión Colexada axúntese esta mesma selmana pa, dempués, convocar la coordinadora, probablemente yá pa la próxima selmana.

La crisis, reconoció'l coordinador xeneral, yera una posibilidá que, en ciertu mou, “podía producise”.

Al respective de la independencia xurídica, Argüelles restó importancia a esi conflictu anque reconoció que s'encargara al gabinete xurídicu un informe pa estudiar la situación. “Lo principal nun ye saber quién manda muncho más, porque sabemos qu'Asturies ye distinta; el mesmu Alberto Garzón nun documentu va dos años reconocíanos la singularidá y, ye distinta, pero tamién entendemos que dientro d'un proyectu federal”. Sía que non, Argüelles esplicó que'l resolvimientu del conflictu va depender de la voluntá de llogralo. “A la fin ye como too, si hai voluntá d'alcuerdos vamos llegar, y si hai voluntá de rotura pos va llegase a la rotura”.

La situación ye, a xuiciu d'Argüelles, “desagradable” y ye que, añedió, “tratase d'un espediente a un compañeru qu'a naide nos gusta esto”.

Ello ye que el máximu responsable d'IX Asturies valoró la figura de Gaspar Llamazares como un activu, anque aseguró qu'a día de güei inda nun se sabe qué va pasar. “Nun sé esactamente lo que va faer o non la Dirección Federal, porque abondo tengo con liderar n'Asturies IX. Lo que nós vamos dar ye la oportunidá d'espresase y d'aldericalo nos órganos d'IX Asturies”.

Sía que non, a cuatro meses de les elecciones, “el ruiu”, afirmó Argüelles, nun beneficia a naide polo qu'abogó pola busca de soluciones: “tamos condergaos a entendenos y creo que tenemos que salir col menor dañu posible pa toos; y avisu, a toos, a toles partes. Hai dos llocomotores qu'al meyor pueden dir topetando o pueden dir baxando la tensión, inclusive coyer víes paraleles pa trabayar pa la sociedá que creo que ye lo que tenemos que faer”.