Menu

El coordinador d'IX y númberu 1 de "Sumar pela Izquierda" afirma que va tratar de llevar la forma de faer política en Mieres, Llangréu o L.lena al Principáu d'Asturies

El coordinador xeneral d’IX Asturies y cabeza de llista nes primaries a la Xunta Xeneral del Principáu, Ramón Argüelles, aseguró güei que la so candidatura lo qu'ufierta ye unidá, daqué polo que, dixo, trabayó hasta'l mesmu momentu de formalizala. “Intentamos faer una candidatura unitaria; de fechu a la candidatura d'Ángela (Vallina) ufiertóse-y el 2 y el 3. Nun foi posible pos lo que fai esti coordinador ye encabezar una candidatura que va ser la que garantice'l día 10 qu’Izquierda Xunida siga sumando y nun sía una debacle sinón que podamos presentar una alternativa al Principáu d'Asturies, una alternativa que la xente pueda sofitar”.

Ramón Argüelles, mientres la presentación oficial de la so llista, apostó por “sumar” pa llograr más fuerza, daqué que, esplicó, asocede na so candidatura, que se caracteriza por ser bien plural. “Hai xente que ta bien a favor de Podemos, otros nun tán a favor de Podemos, quiero dicir, son xente, alcaldes como vistis, Aníbal (Vázquez, alcalde de Mieres), Jesús (Sánchez Antuña, alcalde de Llangréu), Genma (Álvarez Delgado, alcaldesa de L.lena), xente cercano. Y lo que quixera aprender d'esta xente ye que la forma de faer política que tienen, pudiéramos facer nel Principáu d'Asturies”.

El candidatu de “Sumar pela izquierda” aseguró que la so llista tien vocación de Gobiernu d'izquierdes. “Yá que sía posible dempués de les elecciones, lóxicamente, porque IX nun Gobiernu d'Asturies demostró, col Salariu Social y con otres midíes que somos importantes. Tien De conocésenos más por eso que polos problemes que tengamos internos o pola guerra que deamos que, dacuando, tamién ye ciertu que la damos”.

Ramón Argüelles escoyó de forma simbólica la entrada d’Arcelor Mittal en Veriña (Xixón) pa presentar la candidatura "Sumar pela Izquierda", nun actu nel que lu acompañaron los alcaldes de Mieres y Llangréu, el diputáu autonómicu y númberu 3 de la llista, Jaime Gareth Florez, y la secretaria xeneral del PC Asturies, Agustina Guglielmetti.

Amás, tamién participaron la númberu 2 y coordinadora d’IX Mieres, Beatriz González Prieto, la secretaria de Política Municipal d’IX Asturies, Gabriela Álvarez, les conceyales d'Uviéu y Cangas, Cristina Pontón y Laura Álvarez, amás del coordinador local d'IX en Xixón, Faustino Sabio, y el coordinador d’IX L.lena, José González.