Menu

El coordinador xeneral asegura que deseya'l meyor resultáu pa la llista d'Ángela Vallina porque lo será pa IX Asturies

Ramón Argüelles anunció esta mañana, hai malpenes unos minutos, la so decisión d'abandonar la coordinación d'Izquierda Xunida d'Asturies. L'hasta agora coordinador xeneral de la formación esplicó que dimitía pa dexar que quien viniera detrás tratara de llograr la unidá, la suma, qu'él había intentao anque ensin llogralo. El detonante foi la resultancia de les elecciones primaries celebraes el pasáu sábadu a les que se llegó ensin una candidatura de consensu y trés llistes, de les que la qu'él encabezaba quedó en segundu llugar. "La mio dimisión foi porque fui incapaz de faer una llista unitaria y fui incapaz de cola mio propia llista, la llista organizativa, sacar una mayoría pa poder intentar esa unidá si ye posible".

Sía que non. Argüelles deseyó pa la candidatura d'Ángela Vallina el meyor resultáu pos esa resultancia será tamién pa la mesma Izquierda Xunida d'Asturies.

Ramón Argüelles aportunó en que, mientres tol procesu previu a les primaries, el so oxetivu fuera “sumar” pa llograr una llista de consensu mayoritariu. Sicasí, l'alternativa nun foi posible, polo que, finalmente, tómase una decisión que ye la que finalmente se lleva a efectu, con una llista encabezada pol mesmu. “Al nun haber candidatura de consensu axúntase, yo creo que la organización más grande que tien IX Asturies, que ye Xixón, nun órganu, y decide que, yá que nun hai una persona de consensu qu'encabece les primaries que, por organicidá, non por nome nin apellíos nin porque sía'l meyor, sinón por ser el representante d'Asturies, que lo faiga'l coordinador xeneral”.

L'hasta agora máximu responsable d’IX Asturies aseguró qu'asumió l'encargu “por responsabilidá” yá que, añedió, lo qu'en tou momentu trató de faer ye “defender esta organización, defender la so pluralidá y defender que naide sobra n'IX”.

Ramón Argüelles aportunó en que mientres les negociaciones, inda unes hores antes del plazu máximu pa la presentación de les candidatures, ufiertara a la llista d'Ángela Vallina, los númberos dos y trés de la qu'él diba encabezar pero ensin respuesta. “Tengo que correxir a la mio compañera Ángela, que salió nos medios diciendo que yera una imposición-, nun ye una imposición; una imposición ye cuando te dicen: tienes esto tómalo o déxalo. Eso foi una negociación que quixo practicar el coordinador. Esto ye, nós proponemos que'l númberu ún sía'l coordinador, que'l númberu dos vaiga Ángela, que'l númberu trés vaiga Ovidio o xente que consideréis oportuna. Ante una negociación respondese con otra negociación si lo qu'interesa ye llegar a una llista porque pa unes bones resultancies n'Asturies sería muncho meyor haber dio xuntos que separaos. Yo creo qu'eso entiendelo tol mundu. Una candidatura conxunta convida a la militancia a participar más porque, ente otres coses, na dirección tamos d'alcuerdu. Bono, pos nun foi posible, nun se nos contestó a esa ufierta y a otru día rexistróse una candidatura con 34 nomes que ye la llista qu'anguaño tien Ángela Valllina”,.

Ramón Argüelles reconoció, a entrugues de los medios, que la otra candidatura tamién la ufiertara dir de númberu dos. Sicasí, esplicó que la so decisión de nun aceptalo tuvo que ver col refugu a la candidata per parte de les grandes agrupaciones. “Yo nun puedo dir nuna candidatura onde'l númberu ún sía Ángela Vallina cuando ella nun ye'l consensu d'agrupaciones bien importantes: toi falando de Xixón, d'Uviéu, d'Avilés, de L.lena, de Mieres, de Llangréu, etcétera. Nun yera de consensu”.

Argüelles va caltenese como coordinador en funciones hasta que los órganos d'IX decidan, nes próximes selmanes un nuevu coordinador interín que va ser l'encargáu de dirixir la organización hasta que se convoque una nueva asamblea.

Al respective de la confluencia con Podemos, tres el nuevu non de la militancia d’IX Asturies a allegase cola formación morada na última consulta impulsada pola dirección Federal, Argüelles amosóse partidariu de llegar a alcuerdos: "yo intentaría un diálogu (cola dirección federal); eso foi lo qu'intentamos siempres y, si dempués nun hai un diálogu, pos que se tomen les decisiones nos órganos". Sía que non, abogó porque nun haya un "enrocamientu". Por eso, dixo, "el mio conseyu, primero esquizar, falar cola dirección".

Enagora, Ramón Argüelles nun piensa na política y, anque se va caltener en funciones hasta que s'escueya un responsable interín, el so oxetivu ye tornar a la so actividá profesional.