Menu

La diputada d'IX recibe a los manifestantes convocaos por UCA

María José Miranda, diputada d'IX na Xunta Xeneral, responsable de los asuntos de Desenvolvimientu Rural y Recursos Naturales, recibió esta mañana a les puertes del Parlamentu asturianu a los ganaderos asturianos que secundaron la convocatoria de manifestación de la UCA, Unión de Llabradores Asturianos. Miranda sofitó les reivindicaciones d'un “sector tan importante”, afectáu polos daños de fauna selvaxe, el decretu de purinos, la regulación del miel o'l control de la carba y la política forestal.

IX ta acordies coles reivindicaciones puestes de relieve na manifestación que remató nel Parlamentu. A xuiciu de la diputada d'IX la normativa de purín nun puede afectar por igual a tolos territorios del estáu. “El purín nun puede ser café pa toos, caltener la prohibición del so usu revela un desconocimientu total y absolutu de la orografía y del tipu de ganadería d'esta comunidá autónoma”, dixo Miranda, de la qu'abogó por siguir lluchando por caltener la escepcionalidá porque “otra cosa sería acabar cola ganadería na comunidá autónoma”.

De la mesma, encetó'l proyectu de la IGP del miel, una IGP que según IX tien de ser “de verdá”, rexuntando'l consensu con tolos llabradores y con unos controles y unes condiciones y controles, de verdá, qu'aseguren que se trata de miel d'Asturies y na que toos y cada unu de los y les apicultores tengan entrada.

Sobro'l pagu de los daños d'animales selvaxes a los ganaderos, la diputada d'IX considera necesariu un reglamentu que realmente cubra les perdes que se producen polos daños de los animales selvaxes. En cuanto al saneamientu, pa la coalición ye importante tener un control de la tuberculosis de los animales selvaxes porque probablemente ye'l focu que tresmite a les ganaderíes, esplicó la vicepresidenta de la Xunta Xeneral. “Si non se erradica na fauna selvaxe nun la consiguiremos nel ganáu”, dixo dempués de repitir la necesidá d'ayudes destinaes a la inmovilización del ganáu y pal vaciáu, amás de la so forma, porque pueden terminar cola renta y con una familia que se dedique y viva realmente de la ganadería. .

A lo último, María José Miranda refierse a la política forestal. A la so manera de ver, “rescampla que la comunidá precisa una política forestal totalmente distinta”. Pa Miranda, Asturies precisa recuperar la cultura del fueu. “Tola vida nel mundu rural había ganadería y había fueu, y los paisanos sabíen cómo regular la carba”, aseguró. Sicasí, Miranda apostó “por faelo cola conciencia y la consciencia que siempres se fixo pa evitar los problemes que tamos teniendo agora”. Amás, l'alministración tien de caltener montes y terrenes, como los tienen que tener, pa nun arrobinar quemes, porque sinón perxudica, al mesmu siempres, a los ganaderos y ganaderes y llabradores, que son los que pierden les sos propiedaes.