Menu

Carlos González encabeza la llista a l'Alcaldía de Casu con un programa que pretende impulsar comunicaciones, mediu rural, turismu y patrimoniu

La eurodiputada y candidata d'IX a la presidencia d'Asturies, Angela Vallina, sollertó esta mañana en Casu de la meyora de la derecha y la ultraderecha non solo n'España, sinón nel mundu. Vallina participó esta mañana na presentación de la candidatura al conceyu Cassin, qu'encabeza Carlos González. Lo que s'avera, señaló la candidata, “ye'l neolliberalismu puro y duro: el ciudadanu que lo tien qu’iguar pola so cuenta“.

Pela so parte, Carlos González, esbilló, nun actu pa la militancia, el so programa que pasa por esixir énte l'alministración rexonal un impulsu a les comunicaciones, empezando pol puertu de Tarna, pero tamién na conexón con L’Infiestu, midíes pal desenvolvimientu rural, tantu en referir a la ganadería vacuna como a otres pa garantizar el futuru de l'apicultura -güei en peligru polos problemes fitosanitarios qu'aquexen a la castañal-, ensin escaecese de la necesidá d'aprovechar los recursos turísticos del conceyu. ente ellos, la consecución de navegabililidá del banzáu de Tañes.

P’Angela Vallina ye imprescindible dar tola importancia a la política municipal, como primer puerta d'atención a la ciudadanía, con un especial mimu a aquellos territorios menos urbanos. “Carlos tien muncha razón, hai un problema, desdexáronse enforma les zona rurales y desdexóse enforma la perda de población”. Frente a ello, reivindicó la necesidá d'unes bones comunicaciones que favorezan les inversiones y los recursos que cada conceyu puede apurrir en beneficiu de la so sociedá.

Pa la candidata d'IX d'Asturies, les polítiques impulsaes pola Unión Europea nun sirvieron tampoco pa favorecer la permanencia de la población nes zones rurales, nin pal so desenvolvimientu, yá que s'apostó especialmente por macro esplotaciones, tanto ganaderes como agrícoles, en desterciu de modelos tradicionales y sostenibles.

La candidatura de Carlos Gonzalez foi presentada pola coordinadora d'IX de Casu, Katia Argüelles, quien destacó que se trata d'una llista compuesta por xente comprometida con Casu, venceyada con Casu, xente que conoz y vive el día día la realidá d'un conceyu rural d'altu monte”.

Pa la máxima responsable d'IX nesti conceyu, “nun son bonos tiempos pa la política“ y entá menos pa la política municipal, por cuenta d’una lexislación de calter xeneral qu'esgaña a los conceyos que son, recordó, precisamente les alministraciones más cercanes a la ciudadanía.

Llista completa al conceyu de Casu, incluyíos los suplentes.

Carlos Gonzalez Pérez

Alejandra Miriam Martínez Gagliardi

YOlanda González Acebo

Javier Alonso Lozano

Sonia Cabeza Miguel

Adolfo Alvarez González

Ángeles Muñiz Gallinar

Fernando Capellín Iglesias

Milagros Rodríguez González

Eduardo González González

Maria del Carmen Fernández Buenestado

Antonio Capellín Fernández