Menu

Dexar el Muséu y el Castru del Chao en manos de Recrea supondría perder la investigación y dexalo en manos del turismu

Concha Masa, vocera parlamentaria d'IX na Xunta Xeneral, esixó esta mañana a la Conseyería d'Educación y Cultura, que paralice la convocatoria de disolución del Consorciu pa la Xestión del Muséu Etnográficu de Grandas de Salime prevista pa este mesmu vienres coles mires de que sía xestionáu pola empresa Recrea. Pa Masa ye una cuestión dafechu intolerable que la Conseyería d'Educación y Cultura convocara la xunta de Gobiernu del Consorciu de Grandas de Salime pal próximu 24 de mayu xustamente pa liquidar y escastar el consorciu que vieno xestionando'l Muséu de Grandas de Salime y el Chao Samartín. Cultura failo, diz Masa, con total alevosía, prácticamente nel últimu día arteru de la llexislatura, col Parlamentu disueltu y ensin poder pidir nenguna esplicación a la Conseyería.

La diputada apela tamién a la opinión del actual candidatu socialista Adrián Barbón. “Nun sabemos si Adrián Barbón respuende por esta xestión per parte de la Conseyería pero tendría de dar cuentes de por qué quier escastase’l Consorciu pa la xestión del Muséu Etnográficu de Grandas de Salime xustamente nos últimos díes arteros pa esti gobiernu”.

La decisión, supuestamente de treslladar a Recrea la xestión, supondría un cambéu total d'interpretación del Muséu Etnográficu y el Castru del Chao Samartín cuidando que pasaría de tar rellacionáu de forma directa cola investigación a ser namái una institución suxeta al turismu y de forma puramente mercantil. “Ye dafechu intolerable, porque lo que se xuega nel Muséu y el Castru ye una cuestión perimportante na que se ve reflexada la hestoria del pueblu asturianu”, alvierte l'actual diputada d'IX.

Pa Masa ye una actuación propia d'un gobiernu irresponsable, que nun quier responder énte un órganu soberanu como ye la Xunta Xeneral y por eso failo agora que nun se puede tomar nenguna midida parlamentaria.