Menu

La candidata d'Asturies pola Izquierda llama al votu porque asegura que lo que se xuega nestes elecciones ye'l futuru d'Asturies por xeneraciones

La candidata d'Asturies pola Izquierda, Ángela Vallina, cerró güei n'Avilés la ronda de contactos colos axentes sindicales, sociales y económicos con una xunta cola dirección de la Cámara de Comerciu, encabezada pol so presidente, Luis Noguera. L'oxetivu del alcuentru ye falar de la situación pola que traviesa la contorna avilesina, colos retos de la descarbonización, la factura eléctrica pa la gran industria y les comunicaciones, tantu terrestres como les marítimes y aérees.

"Terminemos la campaña axuntándonos cola Cámara de Comerciu d'Avilés, la última Cámara que nos quedaba, porque amás ye una Cámara importante, que conoz la realidá del Puertu d'Avilés", resumió Vallina, pa quien ye imprescindible buscar consensos ente tolos axentes, siquier, en delles materies estratéxiques y de les que, en gran midida, depende'l futuru de la cuenca y d'Asturies.

"Creemos qu'esti ye un momentu nel que tenemos que sumar toos y que tenemos que, ente toos, conocer les soluciones", afirmó la inda eurodiputada d'IX.

Vallina llamó a la máxima participación nes cites electorales del próximu 26 de mayu yá que, dixo, "el domingu nun xugamos a cencielles el Gobiernu, tamos xugando'l futuru d'Asturies pa los nuesos fíos, pa los nuesos nietos".

Nel alcuentru falaronse cuestiones relatives a empreses como ArcelorMittal, Alcoa o Asturiana de Cinc, pero tamién otres de índole xeneral como la política forestal o los accesos a la ZALIA.