Menu

Ovidio Zapico cree que la creación d'esti órganu ente'l gobiernu central y autonómicu ye un bon pasu, pero insuficiente, y pide que s'amplíe'l so ámbitu al restu de grandes proyectos

Izquierda Xunida va pidir que se convoque l'Alianza Político y Social de les Infraestructures énte l'anunciu de la constitución d'una comisión billateral Asturies-Gobiernu Central pa tratar la situación de les cercaníes. Amás, según esplicó esti día´l diputáu y voceru d'IX n'infraestructures, Ovidio Zapico, la formación va reclamar qu'esa comisión amplíese más allá de les cuestiones relatives al ferrocarril pa tratar los grandes proyectos pindios en materia de comunicaciones.

Pa Zapico, la xunta caltenida ente'l presidente d'Asturies, Adrián Barbón, y el Ministru de Fomentu, José Luis Ávalos, supon un pasu delantre de cara a encetar los problemes qu'abasnen les cercaníes, por cuenta d’unes polítiques de “abandonu”. El parllamentariu recordó qu'en payares de 2018 la Xunta Xeneral del Principáu, a propuesta d'IX, aprobó que s'impulsara una Comisión Billateral sobro infraestructures. Por eso, añedió, que se cree una Comisión Billateral pa tratar la situación de les cercaníes ye un pasu adelantre, importante pero insuficiente: “creemos que ye necesariu ampliar esa Comisión al restu d'infraestructures”, esplicó Zapico. Pal diputáu, amás, ye imprescindible que se convoque a los miembros del Pactu poles infraestructures. “L'Alianza foi un finxu importante, porque suponía buscar el máximu consensu pa defender los intereses d'Asturies en daqué tan importante y vital pal nuesu desenvolvimientu. Por eso, agora vamos pidir que se convoque a los sos integrantes de forma previa a la constitución de la Comisión y del entamu de les sos xuntes”.

Zapico señaló que la importancia de les cercaníes va más allá d'un meyora de la infraestructures o de les frecuencies, sinón que supon un pasu imprescindible, dixo, pa “garantizar al llargu plazu la movilidá n'Asturies y la so sostenibilidá”.