Menu

Tola Cámara, sacantes la ultaderecha, alcuerda tratar los retos derivaos de la transición enerxética, la globalización o los costos de la eletricidá.

La Xunta Xeneral del Principáu aprobó güei por aplastante mayoría la propuesta d'Izquierda Xunida pa encetar nun plenu estraordinariu la situación del sector industrial d'Asturies. Ángela Vallina defendió la iniciativa de la que namái se descolgó la ultraderecha.

Asturies, como España o Europa, esplicó Vallina, “enfrentase a retos que, dada la so amplitú y trescendencia, bien pueden considerase cruciales pos van marcar un auténticu cambéu de modelu granible que yá puede adicar y qu'afecten de forma especial al nuesu sector industrial”. La Globalización, la reforma llaboral, aprofió la diputada, favorecieron y facilitaron deslocalizaciones como la de Vesuvius, nun contestu d'amenaces nel que se presenten amás necesidaes inexcusables pa encarar un nuevu modelu sostenible y que sirva, tamién, pa detener el cambéu climáticu.

Na axenda de la propuesta, l'abordaxe de too lo relativo a la transición enerxética, cola busca d'estratexes por que esi cambéu de modelu sía xusto, con una transición real que, avanzó Ángela Vallina, ten de ser aldericada con tolos axentes sociales.

La esmolición cinca tamién a los costos de la enerxía, más dada la importancia del sector electrointensivu n'Asturies que rique un marcu llegal que dexe un suministru a costos competitivos. “Hubo dellos pasu como los 172 millones d'euros alcordaos pol Gobiernu Central pa compensar los costos de CO2 y que van sirvir ensin dulda pa rebaxar la tarifa eléctrica. Sicasí, esto nun ye abondu y ha siguise plantegando l'aprobación d'un estatutu definitivu de la industria electrointensiva”.

Les duldes sobro'l futuru modelu enerxéticu son xustificaes: ello ye que'l cambéu yá tien consecuencies y Asturies pasa de ser una comunidá esportadora d'enerxía a convertise n'importadora, lo que, sollertó Avllina, puede aumentar la debilidá del sector industrial asturianu.