La vocera d'IX n'Uviéu, Cristina Pontón, esixó güei que'l Conceyu conteste d'una vegada por toes a les entrugues que yá formularon va dos meses sobro los pormenores de la execución del contratu de xestión de l'agua.
El silenciu del Gobiernu municipal y la constitución d'una Comisión de Siguimientu Estraordinaria activaron toles alarmes que, a xuiciu de Pontón, podríen significar incumplimientos de caláu nel serviciu pola empresa axudicataria. “Nel casu de que sía daqué, como abarruntamos, d'abonda gravedá, sería motivu pa rescindir esi contratu y que l'agua volviera ser xestionada dende lo público, que ye'l llugar que nunca tuvo d'abandonar“.
“N'IX Uviéu, siempres tuvimos una seria esmolición col contratu de l'agua, sobremanera porque l'agua ye daqué que siempre tuvo que tar xestionáu dende lo público y nunca ser apurríu a manos privaes“, enfatizó Pontón: “presentamos delles entrugues yá'l día cinco d'avientu, esto ye, hai yá dos meses, pa fae-y un siguimientu a esti contratu, sobro temes de lliquidación, de plantiyes, de les hidrantes, que ye una tema bien importante, sobremanera n'Uviéu, dempués de lo que pasó”.
Les entrugues, llamentó Pontón, nunca fueron contestaes y, añedió, “la nuesa esmolición agrávase, non solo por una ausencia de respuesta, sinón porque amás, díes dempués, la Xunta de Gobiernu fai una Xunta Estraordinaria y Urxente pa entamar una Comisión de Siguimientu d'esi contratu. Les comisiones de siguimientu son daqué escepcional que solamente se producen cuando hai discrepancies ente'l Conceyu y la empresa que ta xestionando esi serviciu“.
La vocera d'IX Uviéu esixó al Conceyu tresparencia y anunció qu'Izquierda Xunida nun va dexar de llau conocer tola verdá sobro'l serviciu. ”Daqué ta pasando; probablemente sía daqué grave y consideramos que tenemos derechu a saber qué ye lo que ta asocediendo“.
IX solicito accesu a los pliegos del contratu y a les meyores que nel so día presentó la empresa axudicataria; amás demandó información sobro'l costu del contratu y les cuatro últimes lliquidaciones aprobaes pol Consistoriu nes que se reparen los costos finales del serviciu. Amás riquió información sobro les persones en plantiya encargaes de la xestión del contratu, con indicación de les sos categoríes y el costu del personal según el conveniu; coles mesmes pidió que s'esplique y dean a conocer los distintos espedientes de reinterpretación de la xestión de hidrantes.
NUN HAI ACTOS PREVISTOS
Diputáu Autonómicu y Coordinador d'IX
Diputado Autonómico
(Mas Asturies)
Diputada Autonómica
Convocatoria por Asturies
