Ángela Vallina pregunta na Comisión de Sanidá sobro los protocolos pa pacientes oncolóxicos y pola posibilidá de faer test a profesionales d'establecimientos sociosanitarios onde haya contaxu o haya barruntos
IX d'Asturies quixo güei felicitar al personal sanitario pol so esfuerzu nel control de la pandemia del coronavirus. La vocera de la formación, Ángela Valina, arrincó la so intervención na comparecencia virtual del Conseyeru de Salú, Pablo Fernández Muñiz, reconociendo'l llabor de "los y les trabayadores del nuesu sistema sanitariu pol so especial esfuerzu y dedicación al enfrentase a esta emerxencia".
La crisis del COVID19, esplicó Vallina, ta sometiendo al sistema a "una prueba estrema" magar, matizó, el modelu sanitariu asturianu ta respondiendo bien. Lo cierto ye qu'Asturies, con una población especialmente avieyada, presenta unos datos sobro letalidad que tán bien per debaxo de la media nacional. Asina, frente a un porcentaxe de letalidad del 9,07% nel conxuntu d'España, nel Principáu esta tasa mengua al 4,98%.
Pa Vallina, estos bonos datos nun son una casualidá sinón la resultancia del bon desempeñu de los profesionales sanitarios y, tamién, de la fortaleza del sistema públicu de salú asturianu. Los datos demuestren, añedió la vocera d'IX, "la importancia que tien la inversión sanitaria. A pesar munches vegaes de les llimitaciones y faltes que sufrimos mientres la crisis, Asturies siguió apostando pola so sanidá, inclusive asitiémonos como la segunda comunidá d'España en gastu sanitariu. Por tanto, yo creo que tenemos de reconocelo y de felicitanos tolos qu'apostemos por esti modelu".
Mientres la comparecencia, IX interesose pol protocolu que se ta aplicando pa los pacientes d’oncoloxía, dada la so situación y la necesidá de siguir allegando a los centros hospitalarios pa los sos tratamientos.
Amás, ente les entrugues al Conseyeru Vallina plantegó otres relatives a la necesidá de realizar un estudiu sobro la dimensión de la epidemia n'Asturies y de les persones que yá puedan tar inmunizaes frente al coronavirus.
Asina mesmo, interesóse sobre la posición de Salú sobro la realización de tests a trabayadores de los establecimientos sociosanitarios nos que se detectara dalgún positivu al COVID19 ya, inclusive, cuando puedan esistir barruntos de contaxu.
Dende la perspectiva operativa, Ángela Vallina señaló qu'en comunidaes autónomes como na vecina Galicia tán poniéndose en marcha xornaes afeches al personal sanitario pa "allixerar" la presión sobro unos recursos humanos bien estrenaos. Asina, esplicó, en dellos departamentos pasóse de les xornaes selmanales de cinco o seis díes y dos de descansu, a dos díes consecutivos de trabayu y otros dos díes de descansu. Según el Conseyeru, tamién n'Asturies tán afaciéndose les xornaes pa, per un sitiu, lluchar contra la enfermedá y garantizar l'asistencia y, per otru, tratar d'amenorgar el estrés a los sanitarios.
Diputáu Autonómicu y Coordinador d'IX
Diputado Autonómico
(Mas Asturies)
Diputada Autonómica
Convocatoria por Asturies